საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრი ეკატერინე ტიკარაძე თქმით, შეიქმნა საინიციატივო ჯგუფი, რომელიც „უნივერსალური სამედიცინო ცენტრის“ თანამშრომლების საკითხს შეისწავლის.

„შეიქმნა საინიციატივო ჯგუფი. მედპერსონალის მხრიდან წარმოდგენილია 10 წევრი და ჩვენი მხრიდანაც შეიქმნა საბჭო. ხვალიდან დავიწყებთ კონკრეტულ გეგმებზე მუშაობას. განვიხილავთ, როდის გადავიხდით მათ სახელფასო ანაზღაურებებს, რასაც მე და ჩემი მოადგილე პირადად გავაკონტროლებთ. ჯანდაცვის სამინისტრო არ იყო მართვაში ჩართული, ეს ყოველივე იყო „საპარტნიორო ფონდის“ მმართველობის ქვეშ. ჯანდაცვის სფეროს სჭირდება სპეციფიკური მმართველობა და გამოჩნდა, რომ ჩვენი ჩართულობა ძალიან მნიშვნელოვანია. ჩვენსა და „საპარტნიორო ფონდს“ შორის შენობის ინფრასტრუქტურის მოწესრიგება და ახალ პროექტთან დაკავშირებით კომუნიკაცია არ ყოფილა, მაგრამ სახელმწიფო იზრუნებს შენობის რეაბილიტაციასა და შესაბამისი ინფრასტრუქტურის გაუმჯობესებაზე. როდის დაიწყება მუშაობა, ამას უკვე მოგახსენებთ იმ საინიციატივო ჯგუფისა და ჩვენი საბჭოს ფარგლებში, რომელიც არის შექმნილი. შემდეგი შეხვედრა იქნება ხვალ" - აღნიშნა ჯანდაცვის მინისტრმა.