საქართველოს პარლამენტის იურიდიულ საკითხთა კომიტეტის სხდომაზე, სადაც უზენაესი სასამართლოს მოსამართლეობის კანდიდატ პაატა სილაგაძეს უსმენენ, ეკა ბესელიასა და დავით მათიკაშვილს შორის მორიგი სიტყვიერი დაპირისპირება მოხდა.

დამოუკიდებელი დეპუტატი ეკა ბესელია სიტყვით მიმართავდა მოსამართლეობის კანდიდატ პაატა სილაგაძეს, რა დროსაც დავით მათიკაშვილმა მას მიკროფონი გაუთიშა და კორექტულობისკენ მოუწოდა.

ბესელიამ მათიკაშვილს სასამართლოს ე.წ. კლანის ხელის ბიჭი უწოდა.

„ნუ მიკაკუნებ კალამს. გირჩევ, გაჩერდე. შენ საერთოდ ინტერესთა კონფლიქტი გაქვს და გაჩერდი, არ უნდა შენი დახმარება. სხდომა შენ საერთოდ არ უნდა მიგყავდეს. კიდევ ერთხელ გაფრთხილებ, ხელს ნუ მიშლი. დათო, შენ რომ ასევე ამ კლანის ლობისტი და მათი ხელის ბიჭი ხარ, ეს ჩვენ ვიცით. გაფრთხილებ, დამასრულებინე სიტყვა. დავასრულებ და შენთვის მოვიცლი. ეტყობა, ვერ ისწავლე აქამდე, როგორ უნდა მოიქცე. კიდევ ერთხელ გამორთავ მიკროფონს და დანარჩენს მერე ნახავ. მათიკაშვილო, შენ ხარ ზუსტად ამ კლანის ერთ-ერთი იაფფასიანი მდარე ლობისტი. ხელს ნუ მიშლი, სხდომის გაგრძელება თუ გინდა, თორემ მაგალითები წინ გაქვთ და უარესი არ დაგემართოს შენ პირადად“, – მიმართა ბესელიამ მათიკაშვილს.