ატოცში ანტიოკუპაციურ ჯგუფს პოლიციის მანქანამ გზა ჩაუხერგა და საოკუპაციო ზოლისკენ არ ატარებს(ფოტო)

პოლიტიკა - 16:25, 22 Oct, 2019

1662

ანტიოკუპაციური მოძრაობა "ძალა ერთობაშიას" წევრებს, რომლებიც ატოცში იმყოფებიან, პოლიცია ამ დრომდე არ აძლევს საოკუპაციო ზოლისკენ, სამართალდამცველების კონტროლქვეშ გადაადგილების უფლებას.

დავით ქაცარავას ჯგუფის წევრმა მიხეილ ბალიაშვილმა "ნიუპოსტს" ფოტო მიაწოდა, სადაც ჩანს, რომ "ანტიოკუპაციური ტაქსის" წინ, რითაც ქაცარავას ჯგუფი ატოცში გადაადგილდება, პოლიციის მანქანა დგას და გზა აქვს ჩახერგილი. ბალიაშვილის თქმით, ეს ყველაფერი ატოცში იმ სახლთან ახლოს ხდება, რომელიც ანტიოკუპაციური მოძრაობის წევრებს ადგილობრივმა დაუთმო და სადაც ჯგუფი ღამეს ათევს.

მიხეილ ბალიაშვილი ამბობს, რომ ქურთის პოლიციის განყოფილების უფროსი თემურ ჟუჟნიაშვილი დილიდან 10 წუთს ითხოვს და ჰპირდება, რომ საოკუპაციო ზოლთან აუშვებს, მაგრამ პირობა ამ დრომდე არ შეუსრულებია.

დღეს ატოცის მიმართულებით არ გაატარეს ასევე ჟურნალისტები, ხოლო ერთი ჯგუფი, რომელმაც წინასწარი შეთანხმების შემდეგ ატოცში შესვლა პოლიციის პოსტის გავლით მოახერხა, უკან გააბრუნეს და განუმარტეს, რომ სოფელში მათი შესვლა მიზანშეწონილი არ არის.

შეგახსენებთ, რომ 19 ოქტომბერს რუსმა ოკუპანტებმა ატოცში წინასწარ მონიშნული 330 მეტრი შეღობეს. იმ დღეს ჟურნალისტები და ანტიოკუპაციური ჯგუფის მხარდამჭერები, რომლებიც ატოცში თბილისიდან და სხვა ქალაქებიდან აპირებდნენ ჩასვლას, სოფლიდან 15 კმ-ში გააჩერეს და ატოცის მიმართულებით არ გაატარეს. მედიას მხოლოდ მეორე დღეს მიეცა ატოცში ასვლისა და უკვე დასრულებული ბორდერიზაციის შედეგის გადაღების საშუალება. 21 ოქტომბერს ატოცი ნაწილობრივ ღია იყო ანტიოკუპაციური სამოქალაქო პატრულირებისთვის, ხოლო დღეს შსს-მ ატოცისკენ გზა ისევ გადაკეტა.