სირიაში მიმდინარე სამხედრო ოპერაციის მიზნები და დეტალები - საქართველოში თურქეთის ელჩმა განმარტება გააკეთა

პოლიტიკა - 19:00, 17 Oct, 2019

1074

საქართველოში მდებარე თურქეთის საელჩოში შეხვედრა გაიმართა მედიის წარმომადგენლებთან, სადაც ელჩმა მედიას წარმოუდგინა ჩრდილოეთ სირიაში მიმდინარე სამხედრო ოპერაციის მიზნები და დეტალები.

თურქეთის ელჩმა, ფატმან სერენ იაზგანმა არაერთხელ აღნიშნა შეხვედრისას, რომ სირიაში მიმდინარე ოპერაცია არ წარმოადგენს ქურთების წინააღმდეგ მიმართულ აგრესიას. თურქი დიპლომატის განცხადებით, მთავარ სამიზნეს წარმოადგენს ქურთული მუშათა პარტია “PKK” და მასთან ასოცირებული სირიაში ჩამოყალიბებული ქურთული სამხედრო რაზმი YPG, რომელიც ანკარის მიერ უკვე თითქმის 40 წელია აღქმულია, როგორც ტერორისტულ ორგანიზაციად.

ფატმა იაზგანმა განაცხადა, რომ მედიაში მუსირებს დამახინჯებული ინფორმაცია, იმასთან დაკავშირებით, თითქოს თურქი სამხედრო ძალები ხოცავენ ქურთ მშვიდობიან მოქალაქეებს, რაც სიმართლეს არ შეესაბამება. მისი თქმით, ხშირია შემთხვევები, როდესაც ძველ ვიდეო-ფოტო მასალას სხვადასხვა სოციალური ვებ-გვერდები საზოაგადოების შეცდომაში შეყვანის მიზნით აპიარებენ და ავრცელებენ ისე, თითქოს იგი ამჟამინდელი სპეცოპერაციის ამსახველი ფაქტები იყოს. ელჩმა აღნიშნა აგრეთვე, რომ სამოქალაქო პირების გარდაცვალების ცალკეული შემთხვევების მიზეზი არის ის, რომ ქურთი ტერორისტები მათ ფარად იყენებენ თავის დასაცავად. შეხვედრაზე განაცხადეს, რომ თურქი სამხედროების მიერ წარმოებული სპეცოპერაციის ფონზე მშვიდობიანი მოქალაქეების გარდაცვალების ძალიან მცირე ფაქტებია- იმაზე ბევრად ნაკლები , ვიდრე ეს რამდენიმე წლის წინ აშშ-ს მიერ წარმოებულ საბრძოლო ოპერაციაში მოხდა ისლამური სახელმწიფოს წინააღმდეგ.

დიპლომატმა აღნიშნა, რომ თურქეთის მაღალჩინოსნებს აქვს კოორდინაცია სხვა ქვეყნის წარმომადგენლებთან რაიმე კონფლიქტის, გაუგებრობისა და დაპირისპირების თავიდან აცილების მიზნით.

თურქეთის ელჩმა კომენტარი გააკეთა სოციალური ქსელით გავრცელებულ ინფორმაციაზე, რომელიც თურქეთის მიერ აჭარის მიტაცების საკითხს ეხებოდა. მისი თქმით, აღნიშნული არის დეზინფორმაცია და სიმართლეს არ შეესაბამება.

NEWPOSTS-ის ჟურნალისტის მიერ დასმულ შეკითხვაზე, თუ როგორ წარმოუდგენიათ თურქ პოლიტიკურ ლიდერებს ჩრდილოეთ სირიაში ე.წ 30 კილომეტრიანი უსაფრთხო ზონის შექმნის პერსპექტივა სირიის სამთავრობო ძალებისა და რუსი სამხედროების თურქეთთან მოსაზღვრე ქალაქებში შესვლის ფონზე, დიპლომატმა განაცხადა, რომ მათ იმედი აქვთ, რომ ტერორისტებთან თანამშრომლობაზე უარს განაცხადებენ ზემოაღნიშნული ქვეყნების საჯარისო ნაწილები.