არასრულწლოვანის მიმართ გარყვნილი ქმედებისთვის ბოლო 6 თვეში 28 პირია დაპატიმრებული

პოლიტიკა - 13:48, 17 Oct, 2019

924

მხოლოდ ბოლო ექვსი თვის განმავლობაში, არასრულწლოვანის მიმართ გარყვნილი ქმედების გამო 28 პირს პატიმრობა მიესაჯა - საგანგაშო სტატისტიკას აქვეყნებს უფლებადამცველი ბაია პატარაია, რომელიც თავის სტატუსში "ფეისბუქზე" გავრცელებულ 7 წლის გოგონას ცეკვის ვიდეოს გამოეხმაურა და მეურვეებს მოუწოდა, მსგავსი ვიდეოების გავრცელებისგან თავი შეიკავონ და ზოგადად, ნუ გახდიან არასრულწლოვანებს პედოფილების სამიზნედ.

ბოლო დროს არასრულწლოვანთა მიმართ გარყვნილი ქმედებების შესახებ ინფორმაცია ქართულ მედიაში საკმაოდ გახშირდა. ბოლო დღეებში განხილვის საგანი იყო გორში მომხდარი შემთხვევა, სადაც ხანდაზმული მამაკაცი 5 წლის გოგონას მიმართ გარყვნილი ქმედების გამო დააკავეს.

როგორც გაირკვა, მოსამართლემ შემამსუბუქებელ გარემოებად მიიჩნია იშემიური ინსულტი, რომელიც მამაკაცს ჰქონდა გადატანილი და მას 6 წლით თავისუფლების აღკვეთა მიუსაჯა, რამაც ფეისბუქზე, ძირითადად, აღშფოთება გამოიწვია. როგორც ერთერთი სიუჟეტიდან გახდა ცნობილი, მამაკაცმა გოგონა სახლში შეიტყუა. მსჯავრდებულის ადვოკატის განცხადებით, მსგავსი შემთხვევა მხოლოდ ერთხელ მოხდა, მაგრამ საბრალდებო დასკვნაში წერია, რომ მამაკაცი გარყვნილ ქმედებებს პერიოდულად მიმართავდა.

საინტერესოა, რომ 2017 წელს საქართველოში პედოფილიის 174 შემთხვევა დაფიქსირდა. 2018 წელს - 287.