იყენებდა თუ არა ივანიშვილი პროგრეს ბანკს ფულის გასათეთრებლად და იყიდა თუ არა "თი ბი სი"-მ ბანკი თავის დროზე

იყენებდა თუ არა ივანიშვილი პროგრეს ბანკს ფულის გასათეთრებლად და იყიდა თუ არა "თი ბი სი"-მ ბანკი თავის დროზე - ხაზარაძის განმარტება

პოლიტიკა - 19:54, 16 Oct, 2019

1200

„თიბისი ბანკისა“ და საზოგადოებრივი მოძრაობა „ლელოს“ დამფუძნებელ, მამუკა ხაზარაძე ამბობს, რომ თავის დროზე „თიბისი ბანკმა“ "პროგრეს ბანკის"
რამდენიმე ჯანსაღი აქტივი შეიძინა. დანარჩენი, თავის ბანკიანად, კი ეროვნულმა ბანკმა ძალიან ოპერატიულად გააქრო რადარებიდან.

„კალაძის და ყველა დაინტერესებული პირის გასაგონად ვიტყვი, რომ ჩვენ ბანკი არ შეგვიძენია, „თიბისი ბანკმა“ შეიძინა რამდენიმე ჯანსაღი აქტივი, მაგრამ ის, რაც იქ დახვდა „თიბისი ბანკს“, იმის ხელის ხლება არ შეიძლებოდა, მარტივად რომ ვთქვათ. შესაბამისად, რამდენიმე ჯანსაღი აქტივი იქნა შეძენილი და დანარჩენი, თავის ბანკიანად, ეროვნულმა ბანკმა ძალიან ოპერატიულად გააქრო რადარებიდან. ამიტომ, ეროვნული ბანკის პრეზიდენტი, ის ადამიანები, პროკურატურა უნდა დაინტერესდნენ"- თქვა ხაზარაძემ.

ხაზარაძემ თქვა, რომ პროგრეს ბანკის საქმე არის საზოგადოებისთვის ძალიან ფართოდ გამოსააშკარავებელი.

"მოვუწოდებ ივანიშვილის პირად ადვოკატს, რომ გამოითხოვოს ეროვნული ბანკიდან ყველა ის მასალა და საზოგადოებას ისეთივე ბრიფინგებით გააცნოს ამის შესახებ, რა ბრიფინგებითაც აცნობდა ჩვენს შესახებ. პირდაპირ გეუბნებით, აქ რაღაც კომენტარები გაჩნდა, რომ თითქოს ჩვენ რაღაცის რაღაცით გადაფარვა გვინდა, თვითონ ჩვენი ქმედება, რომ ჩამოვშორდით „თიბისი ბანკს“, ჩამოვშორდით ანაკლიას, მხოლოდ და მხოლოდ იმის გამო, რომ საზოგადოებამ გაიგოს, ნებისმიერ ტრანზაქცია, რომელიც ჩვენ გვიკავშირდება, ვართ ძალიან გახსნილები, ძალიან გამჭვირვალეები, დავდივართ სასამართლოში და საზოგადოება გაიგებს, რა აბსურდულ ბრალდებასთან გვაქვს საქმე. თუ ესაა მიდგომა, მაშინ ყველა შემთხვევაში, ყველა მსგავსი საკითხი უნდა იქნას პროკურატურისთვის, სამართალდამცავი ორგანოებისთვის და საზოგადოებისთვის გამოძიების საგანი“, - განაცხადა ხაზარაძემ.

"ლელოს" დამფუძვნებელი არ პასუხობს კითხვას, ხომ არ ხდებოდა ამ ბანკის გამოყენება ივანიშვილის მხრიდან საკუთარი ფინანსური რესურსებისთვის:

„ეს გამოძიებამ უნდა დაადგინოს. ეს საუბრები დაიწყო ივანიშვილმა. თქვენ გახსოვთ მისი სატელევიზიო ინტერვიუები. ჩვენ ეს საუბრები არ დაგვიწყია ახლა, იმიტომ, რომ ვიღაცას სამაგიეროს ვუხდით. მინდა თქვენთან და ჩვენს შვილებთან ერთად ვიცხოვრო სამართლიან ქვეყანაში, სადაც კანონი კანონობს, სადაც კანონისთვის არ არის გამონაკლისი და კანონი არის ყველასთვის. მე წამოვედი პოლიტიკაში, დავტოვე ბიზნესი და ყველაფერს გავაკეთებ იმისთის, რომ კანონი იყოს უზენაესი, გამჭვირვალე და სუფთა ადამიანების საკეთებელი საქმე“, - განაცხადა ხაზარაძემ.