ეკონომიკის სამინისტრო: მზად ვართ, ჩავერთოთ ვეტერანი ავიატორების სოციალური თუ სხვა სახის პრობლემების გადაწყვეტაში

პოლიტიკა - 20:45, 12 Oct, 2019

1114

ეკონომიკისა და მდგრადი განვითარების სამინისტრო თბილისის აეროპორტის ყოფილი თანამშრომლების პროტესტს სპეციალური განცხადებით ეხმიანება.
უწყებაში აცხადებენ, რომ მზად არიან ვეტერანი ავიატორების სოციალური თუ სხვა სახის პრობლემების გადაწყვეტაში ჩაერთონ:

„გვინდა, გამოვხატოთ ჩვენი დიდი პატივისცემა საქართველოს საავიაციო სფეროს ყველა წარმომადგენლის, მით უფრო ვეტერანი ავიატორების მიმართ, რომლებმაც შექმნეს ქართული საავიაციო სკოლა და საფუძველი ჩაუყარეს ამ დარგს საქართველოში. ამიტომ, ძალიან ვწუხვართ, როდესაც ამ ადამიანების სახელით ზოგიერთი არასერიოზული პოლიტიკოსი ცდილობს ქულების ჩაწერას.

კერძოდ, გვინდა განვუმარტოთ დღევანდელი შეხვედრის მონაწილე ადამიანებს, რომ ნათია თურნავას არანაირი მონაწილეობა არ მიუღია თბილისის აეროპორტის კერძო ინვესტორისთვის გადაცემის პროცესში, რომელიც 2005 წელს განხორციელდა. მეტიც, ის ამ დროს, საერთოდ არ მუშაობდა ეკონომიკის სამინისტროში. კიდევ ერთხელ გვინდა, პატივისცემა გამოვხატოთ ავიაციის სფეროს წარმომადგენელთა მიმართ და იმედი გამოვთქვათ, რომ ისინი არ აყვებიან პროვოკაციას და არ შეუწყობენ ხელს ცრუ ინფორმაციის უნებურ გავრცელებას. ამასთან, მზადყოფნას გამოვხატავთ, სამინისტროს სახელით ჩავერთოთ ვეტერანი ავიატორების წინაშე მდგარი სოციალური თუ სხვა სახის პრობლემების გადაწყვეტაში და დავიცვათ მათი ინტერესები ისევე როგორც ყოველთვის როდესაც საქმე ეხება საქართველოს ეკონომიკაში დასაქმებული ადამიანების ინტერესებს,“ – აღნიშნულია განცხადებაში.

საქართველოს მფრინავთა ასოციაციის წევრები, საერთო კრების გადაწყვეტილებით, მინისტრ თურნავას წინააღმდეგ სარჩელის შეტანას აპირებენ.

მფრინავები ნათია თურნავას სიცრუეში ადანაშაულებენ. მათი განცხადებით, ამჟამინდელმა ეკონომიკის მინისტრმა, რომელიც 15 წლის წინაც ეკონომიკის მინისტრის მოადგილის თანმდებობას იკავებდა, ყველა ავიატორი მოატყუა იმის თაობაზე, რომ საქართველოს აეროპორტი გატანილი იქნებოდა პრივატიზაციაზე და ავიატორები ამ პროცესში აუცილებლად მიიღებდნენ მონაწილეობას. თუმცა აქციები ისე გადაეცა ინვესტოებს, რომ ავიატორებისთვის და მფრინავებისთვის კომპენსაციაც კი არ მიუციათ.