თამთა თოდაძის ადვოკატი თამარ ლუკავა, სექსუალური ძალადობის მცდელობასა და ფიზიკურ ძალადობაში ბრალდებული ილია ჯიშკარიანის ადვოკატს პასუხობს.

ლუკავას თქმით, სასწრაფო-სამედიცინო დახმარების ჯგუფის ექიმები, რომლებმაც ინცინდენტის შემდეგ თოდაძე ნახეს არ ადასტურებენ ფაქტს, რომ თოდაძე უგონო ნასვამ მდგომარეობაში იყო.

"ისინი პირიქით უთითებენ, რომ თამთას მიაღებინეს მედიკამენტები, გამომდინარე იქიდან, რომ მას ჰქონდა მძიმე ემოციური ფონი. რომც ყოფილიყო ნასვამ მდგომარეობაში, ეს იმას ნიშნავს, რომ ილია ჯიშკარიანმა თავისი დანაშაული ჩაიდინა თამთას უმწეო მდგომარეობის გამოყენებით, მაგრამ ჩვენ არ ვამბობთ ამას,"- ამბობს ლუკავა.

ლუკავა სიცრუეს უწოდებს მარიამ კუბლაშვილის, განცხადებას, რომ უგონოდ ნასვამ მდგომარეობაში მყოფმა თოდაძემ საოფისე ინვენტარი ჯერ თავად დაამტვრია, მერე კი შუშის ნამხვრევებზე თავად წაიქცა და თავად გაიჭრა ხელი.

"თამთას აქვს ფეხზე მიყენებული დაზიანება, რომელიც საზოგადოებამ არაერთხელ ნახა სატელევიზიო ეთერით, სილურჯეები და ექსპერტიზის დასკვნაში წერია, რომ ეს დაზიანებები არის მიღებული ბლაგვი საგნის დარტყმის შედეგად. თამთა რომ წაქცეულიყო ნამსხვრევებზე, მას ფეხზე არ ექნებოდა ასეთი დაზიანება და ფეხზე ექნებოდა ჭრილობები," - ამბობს ლუკავა ტვ პირველთან საუბარში.