მდინარაძე: ნაზი ჯანეზაშვილმაც ის უნივერსიტეტი დაამთავრა, სადაც შალვა თადუმაძე სწავლობდა

პოლიტიკა - 11:25, 10 Oct, 2019

1618

პარლამენტში ფრაქცია "ქართული ოცნების" თავმჯდომარის, მამუკა მდინარაძის განცხადებით, ნაზი ჯანეზაშვილმა იგივე უმაღლესი სასწავლებელი დაამთავრა, რომელიც შალვა თადუმაძემ. ამის შესახებ მდინარაძემ იურიდიული კომიტეტის სხდომაზე განაცხადა, სადაც უზენაესის მოსამართლეობის კანდიდატ ზაზა თავაძეს უსმენენ.

მამუკა მდინარაძის თქმით, ინსტიტუტს, რომელშიც შალვა თადუმაძე სწავლობდა, 2003 წლიდან ნოდარ დუმბაძის სახელი მიენიჭა.

„ერთ-ერთი მთავარი არგუმენტი, რის გამოც ეჭვი შეიტანეს დეპუტატებმა მისი დიპლომის ნამდვილობაში, იყო ის, რომ ინსტიტუტს, სადაც ის სწავლობდა, 2003 წლიდან მიენიჭა ნოდარ დუმბაძის სახელი. ჩვენი ოპონენტების მხრიდან მთელი დღის განმავლობაში ვისმენდით შეურაცხმყოფელ განცხადებებს. ისეთი შეურაცხყოფების ფონზე მიმდინარეობდა ეს პროცესი, რომ გენერალურ პროკურორს თაღლითიც კი უწოდეს. შეუძლებელია დიპლომში მითითებული იყოს ნოდარ დუმბაძის სახელობის ინსტიტუტი 2003 წლამდე", - განაცხადა მამუკა მდინარაძემ იურიდიულ საკითხთა კომიტეტის სხდომაზე.

კომიტეტის გუშინდელ სხდომაზე ოპოზიციამ მოითხოვა, თუნდაც ერთი დიპლომი წარმოედგინათ იმ ინსტიტუტის, რომელიც შალვა თადუმაძის არგუმენტით, 2003 წლამდე საგადასახადო რეესტრში იყო დაფიქსირებული შემოკლებით, როგორც თბილისის ჰუმანიტარული ინსტიტუტი.

„მე დავპირდი საზოგადოებას, უმოკლეს ვადაში მომეძიებინა დამატებითი არგუმენტები. გუშინვე მე და ანრი ოხანაშვილმა გავიხსენეთ კურსდამთავრებული, რომელმაც 2003 წლამდე დაამთავრა ეს ინსტიტუტი და მის დიპლომში 2002 წელი ფიქსირდება. ამ ადამიანის სახელი და გვარია ნაზი ჯანეზაშვილი. ქალბატონი ნაზის კვალიფიკაციაში და დიპლომის ნამდვილობაში არ გვეპარება ეჭვი. ასეთი ეჭვის გამოთქმის საფუძველი არ გვქონდა. მან ეს დიპლომი წარმოადგინა მაშინ, როდესაც ის იყო კანდიდატი და შემდეგ იყო მხარდაჭერილი პარლამენტის მიერ. ჩვენთან ერთად ჩვენმა პატივცემულმა ოპოზიციონერებმაც დაუჭირეს მას მხარი", - აღნიშნა ფრაქცია „ ქართული ოცნების" თავმჯდომარემ.