"ნაციონალურმა მოძრაობამ" თემირლან მაჩალიკაშვილის საქმეზე დროებითი საგამოძიებო კომისიის შექმნის თაობაზე ინიციატივა დაარეგისტრირა

პოლიტიკა - 15:00, 09 Oct, 2019

584

„ნაციონალური მოძრაობამ" პარლამენტში თემირლან მაჩალიკაშვილის საქმეზე დროებითი საპარლამენტო საგამოძიებო კომისიის შექმნის თაობაზე ინიციატივა დაარეგისტრირა.

ოპოზიციის წარმომადგენლები იმედოვნებენ, რომ საგამოძიებო კომისიის შესაქმნელად საჭირო ხელმოწერები მოგროვდება.

„წინა ჯერზე, როდესაც პარლამენტმა ჩააგდო საგამოძიებო კომისიის საკითხი, საფუძვლად მოიყვანა მთავარი პროკურორის განცხადება, რომ აღნიშნულ საქმეზე საგამოძიებო მოქმედებები დასრულდებოდა და დასკვნით განცხადებას გააკეთებდნენ ისინი ექვსი მაისის შემდეგ ორი თვის ვადაში. მას შემდეგ ხუთ თვეზე მეტი გავიდა, ხედავთ, რომ ეს განცხადება ისეთივე ყალბი იყო, როგორც შალვა თადუმაძის დიპლომი, რადგან ხუთი თვის მერეც არანაირი დასკვნითი განცხადებები არ გაკეთებულა, არ დასრულებულა ეს საქმე. ჩვენ გადავწყვიტეთ, რომ თავიდან მივმართოთ პარლამენტს მოთხოვნით, რომ შეიქმნას საგამოძიებო კომისია. საჭიროა სულ 50 დეპუტატის ხმა, ოპოზიცია და იმედი მაქვს, დამოუკიდებელი დეპუტატები ამას მხარს დაუჭერენ, ერთობლივად 30-ზე მეტი დეპუტატია, შესაბამისად, სულ 17-18 უმრავლესობის დეპუტატის თანხმობა იქნება საჭირო, რომ საგამოძიებო კომისია შეიქმნას”, - განაცხადა ბოკუჩავამ.

დეპუტატმა იმედი გამოთქვა, რომ ინიციატივას უმრავლესობის წევრების მხარდაჭერა ექნება.

„აქამდე, როდესაც ბიძინა ივანიშვილისთვის მნიშვნელოვანი საკითხები განიხილებოდა, სამწუხაროდ, კოლექტიურ და მონურ მორჩილებას ვხედავდით, ძალიან მცირე გამონაკლისებით. გვახსოვს მარიამ ჯაში, რომელმაც ნიკა მელიას დაჭერას არ მისცა ხმა, ასევე, რომან კაკულია, შეიძლება ერთეულები გამოიძებნონ „ოცნებაში“, რომელთაც ესმით, რომ შვილმოკლულ მამას უნდა ჰქონდეს პასუხები”, – განაცხადა ბოკუჩავამ.