"არ უნდა იყოს პოლიტიკური ჩარევები იმ ადამიანების საქმიანობაში, რომლებმაც დატოვეს რუსთავი 2" - ეუთოს წარმომადგენელი მედიის თავისუფლების საკითხებში

პოლიტიკა - 15:05, 09 Oct, 2019

989

"მედია თავისუფლება სამხრეთ კავკასიაში" - ამ თემაზე თბილისში კონფერენცია იმართება.

ავტორიტეტული ორგანიზაციის წარმომადგენლები კარგად არიან ინფორმირებულები როგორც რუსთავი 2-ში განვითარებულ მოვლენებზე ასევე ქვეყანაში არსებულ გამოწვევების შესახებ.

აღნიშნულ ფორუმს უძღვება ეუთოს წამომადგენელი მედია თავისუფლების საკითხებში ჰარლემ დეზირი, რომელმაც განაცხადა, რომ მედია პლურალიზმი არის მთავარი ქვეყანაში.

"როდესაც ვსაუბრობთ, რომ მედია უნდა იყოს თავისუფალი. რა თქმა უნდა, ჩვენ ყურადღებით ვაკვირდებით რუსთავი 2 ის საქმეს. განსაკუთრებით იმ მომენტიდან, როდესაც ეს საქმე ადამიანის უფლებათა ევროპულ სასამართლოში განიხილებოდა. რის შემდეგადაც, მოხდა მფლობელების შეცვლა. ჩვენთვის ყველაზე მნიშვნელოვანია, იყოს მედიის მრავალფეროვნება. არ უნდა იყოს პოლიტიკური ჩარევები, რომელიმე მედიასაშუალებების. ჩვენი დიდი სურვილია, არ მოხდეს ჩარევა იმ ადამიანების საქმიანობაში, რომლებმაც დატოვეს რუსთავი 2, მედიაპლურალიზმი არის უმნიშვნელოვანესი ქვეყნის დემოკრატიისთვის" - აღნიშნა დეზირმა.

ორდღიან ღონისძიებაზე ექსპერტთა ოთხი ჯგუფი განიხილავს შემდეგ თემებს: ციფრული ტექნოლოგიების ხანაში ახალი ამბების შექმნა და გავრცელება, ჟურნალისტების უსაფრთხოება პოლიტიკური ცვლილებების დროს, მედიის თავისუფლებისა და პლურალიზმის უზრუნველსაყოფად სამართლებრივი მარეგულირებელი გარემოს შექმნა, მედიის თავისუფლების თვალსაზრისით რეგიონში მიმდინარე მოვლენების ზოგადი მიმოხილვა.