თბილისის საქალაქო სასამართლოსთან 20-21 ივნისის აქციაზე დაკავებულების მხარდასაჭერი აქცია გაიმართა.

"დღეს ჩემი შვილისა და სხვა პოლიტპატიმრების სასამართლოა. მიზეზი ამ აქციის არის ის, რომ სამართალი ამ სასამართლოში ნამდვილად არ სუფევს. ეს არის ქაჯეთის ციხე, აუღებელი, ამას სასამართლოს შენობას ვერ დავარქმევ. ჩემი შვილი მე-8 დღეა რაც შიმშილობს. ათი დღე მიმიცია ამ სასამართლოსთვის, თუ ჩემი შვილი 10 დღეში არ გაათავისუფლეს, მეც პარლამენტის შენობის წინ შიმშილობას დავიწყებ. მინდა მოვუწოდო ყველას, არასამთავრობო ორგანიზაციებს და ოპოზიციურ პარტიებს, გავერთიანდეთ, დავივიწყოთ ერთმანეთის წყენა, რა დროს წყენაა, ქვეყანა თავზე გვემხობა", - განაცხადა ერთ-ერთი დაკავებულის ბესიკ თამლიანის დედამ, რუსუდან თამლიანმა.