„გამოდი სამართლიანობისთვის, თავისუფლება პოლიტპატიმრებს“ - აქცია ხვალ საქალაქო სასამართლოსთან ირაკლი ოქრუაშვილის, გურამ ჩალაგაშვილის და „გავრილოვის საქმზე“ დაკავებულთა პროცესის პარალელურად გაიმართება

პოლიტიკა - 19:05, 07 Oct, 2019

860

„გამოდი სამართლიანობისთვის, რადგან ხვალ მსხვერპლი შეიძლება აღმოჩნდე შენ!“ - ამ მოწოდებით გაიმართება ხვალ თბილისის საქალაქო სასამართლოსთან აქცია, რომლის ორგანიზატორები არიან „მოძრაობა გავრილოვი პატიმრები“ და პარტია „გამარჯვებული საქართველოსთვის“.

აქცია ხვალ უკავშირდება ე.წ. გავრილოვის საქმეზე დაკავებულ 6 პირისა და ირაკლი ოქრუაშვილის და გურამ ჩალაგაშვილის პროცესებს.

„8 ოქტომბერს გაიმართება პოლიტიკური მოტივებით დაკავებულ პირთა სასამართლო პროცესები. ესენი არიან: "გავრილოვის პატიმრები" - 6 პირი, რომლებსაც ბრალად ედებათ 20 ივნისს ჯგუფური ძალადობის ორგანიზება, მორის (ჰუსეინ) მაჩალიკაშვილი, რომელსაც ასევე აბსურდული ბრალი აქვს წაყენებული, ირაკლი ოქრუაშვილი - ბიძინა ივანიშვილის პირადი პატიმარი და გურამ ჩალაგაშვილი, რომელსაც ასევე პოლიტიკური მოტივებით ებრძვის ხელისუფლება. ჩვენ არ ვაპირებთ გაჩუმებას, რადგან ეს ადამიანები სხედან ციხეში საქართველოს სიყვარულისთვის და ბიძინა ივანიშვილის წინააღმდეგობისთვის! პოლიტიკური რეპრესიები ერთხელ და სამუდამოდ უნდა დასრულდეს! დღეს ადამიანები ისჯებიან სიმართლისთვის, სამშობლოს სიყვარულისთვის, ოკუპაციის გაპროტესტებისთვის! გამოდი სამართლიანობისთვის, რადგან ხვალ მსხვერპლი შეიძლება აღმოჩნდე შენ!“ - ნათქვამია აქციის ორგანიზატორების განცხადებაში.

აქცია სოციალური ქსელით დაანონსდა და ის საქალაქო სასამართლოსთან 10:30 საათზე დაიწყება.