ფრანგულმა გამოცემა LE FIGARO-მ გამოაქვეყნა სტატია სათაურით ,,საქართველო სუსტდება ევროპასა და რუსეთს შორის მეგობრული ურთიერთობის დამყარების ფონზე“. სტატიაში პატრიოტთა ალიანსის ლიდერს, ირმა ინაშვილს ბაბა იაგას უწოდებენ. ავტორი იხსენებს ინციდენტს, რომელიც სექტემბერში გამართულ კონფერენციაზე მოხდა, როდესაც ინაშვილმა სცადა მისი ჩაშლა.

,,იგი ბაბა იაგას ჰგავს, რუსული ზღაპრის პერსონაჟს, რომელიც ბავშვებს აშინებს. მთლიანად შავებში ჩაცმული, მოელვარე თვალებით, მჭახე ხმით, ირმა ინაშვილი რაკეტასავით შემოიჭრა სექტემბრის თვეში თბილისში მაკეინის ინსტიტუტის მიერ ორგანიზებულ კონფერენციაზე, სადაც რუსეთის პოლიტიკა და პრორუსული ძალების მოქმედება განიხილებოდა’’,- ამბობს ჟურნალისტი პრორუს პოლიტიკოსზე.

სტატიის ავტორი აღნიშნავს, რომ ინციდენტი, რომელიც ნახევარ საათს გაგრძელდა და თითქმის ფიზიკურ დაპირისპირებამდე გადაიზარდა, ასახავს იმ რთულ პოლიტიკურ ვითარებას რაშიც საქართველო იმყოფება.