ფრაქცია „ნაციონალური მოძრაობის“ წევრის რომან გოცირიძის შეფასებით, ტაქსების რეგულაცია უგუნური გადაწყვეტილებაა. დეპუტატი შავი ბაზრის გაჩენას არ გამორიცხავს.

„26 ათასი ტაქსისტი დატოვეს უმუშევარი. ამ ადამიანების მშიერ-მწყურვალის დატოვება დანაშაულია. მაშინ როცა არაფერი იცვლება - არც ტაქსის ხარისხი, არც სისუფთავე თუნდაც, არც გამართულობა, მგზავრის უსაფრთხოება. იცვლება ერთადერთი რამ - უნდა შეღებო თეთრად. ეს ესთეტიკაა ღატაკი ქვეყნისთვის მნიშვნელოვანი, თუ ის ოჯახები, რომლებსაც ეს ადამიანები არჩენენ? ეს ხალხი არალეგალურად დადის უკვე ქუჩაში, ნებისმიერ ადამიანს უჩერებენ, ის ადამიანებიც დაბნეულები არიან, არ იციან ტაქსია თუ კრიმინალი ზის. როდესაც იწყება ასეთი უგუნური რეგულირება, ბაზარი აუცილებლად შავ ხვრელებს იპოვის. ეს იყო ერთის მხრივ უგუნური გადაწყვეტილება, მეორეს მხრივ კორუფცია, ვიღაცას კაზინოს რეკლამები რომ მიეხატა ტაქსზე? ან ტაქსის ოპერატორებისათვის მუქთად კლიენტები ეშოვნა და ტაქსისტებს ხარკი ეხადათ? საქართველო არის ღატაკი ქვეყანა. ამ ქვეყანაში პრიორიტეტი თეთრ ესთეტიკაზე კი არ არის, პრიორიტეტია შიმშილის დაძლევა. ამ 26 ათასი ტაქსისტისგან ნახევარი წავა შავ ბაზარზე, ნახევარი უცხოეთში. საქართველოს სტატისტიკა მოსახლეობის დაცლის თვალსაზრისით გაიზრდება სწორედ ტაქსის მძღოლების ხარჯზე“, - განაცხადა რომან გოცირიძემ.