საქართველოს მესამე პრეზიდენტის მიხეილ სააკაშვილის თქმით, უკრაინაში სპეცოპერაციის შედეგად ლიკვიდირებული კრიმინალური ავტორიტეტი შოთა ჭიჭიაშვილი უკრაინაში მისი და მისი გარემოცვის შესახებ ინფორმაციის შეგროვების მიზნით იმყოფებოდა.

სააკაშვილის თქმით ჭიჭიაშვილი „ძალიან საშიში დამნაშავე“ იყო.

"კრიმინალ ჭიჭიაშვილს ჩემი პრეზიდენტობის დროს მიუსაჯეს 22 წელი, შემდეგ ივანიშვილის ბრძანებით გამოუშვეს და ჩემი ინფორმაციით, სპეცდავალებით გამოუშვეს უკრაინაში. ის უკრაინაში გუშინ პოლიციამ მოკლა შეიარაღებული წინააღმდეგობის გაწევის მერე. ჩემი წყაროს ინფორმაციით, ის ბოლო დროს ოდესაში იყო და ინტენსიურად აგროვებდა ინფორმაციას ჩემი გარემოცვის წევრებზე, რაზეც გაგვაფრთხილეს კიდევაც უკრაინელმა სამართალდამცავებმა" - წერს სააკაშვილი.

მისი თქმით, „საჭიროა, გამოძიებულ იქნას მისი კავშირი ქართულ სპეცსამსახურებთან, რომლებიც თავის მხრივ კონტროლირებულნი არიან რუსი კოლეგების მიერ“.