დავით ქაცარავა: ოკუპანტები ავტობანს უმიზნებენ, წაღვლი-ჩორჩანის ტყე მხოლოდ ტესტია

პოლიტიკა - 10:40, 01 Oct, 2019

4335

"საოკუპაციო რეჟიმის მიერ შექმნილი რუკით, ოკუპანტები უმიზნებენ თბილისი-გორის ავტობანის დაახლოებით 40კილომეტრიან მონაკვეთს, გორს და მცხეთას, წაღვლი-ჩორჩანის ტყე მხოლოდ ტესტია", - წერს ანტიოკუპაციური მოძრაობა "ძალა ერთობაშიას" დამფუძნებელი და ლიდერი დავით ქაცარავა "ფეისბუქზე".

დავით ქაცარავა 1 ოქტომბერს ერგნეთში ჩანიშნულ მორიგ შეხვედრას ეხმიანება, სადაც ევროკავშირის სადამკვირვებლო მისიის მონაწილეობით ქართული, ოსური და რუსული მხარეები პერიოდულად განიხილავენ რეგიონში შექმნილ ვითარებას.

ბოლო პერიოდში შეხვედრებმა ინტენსიური ხასიათი მიიღო, თუმცა, როგორც წესი, ისინი არსებით საკითხებზე შეთანხმების გარეშე სრულდება. შეხვედრების ინტენსივობა ხაშურის რაიონის სოფელ ჩორჩანის ტყეში ქართული პოლიციის საგუშაგოს გახსნამ გამოიწვია, რასაც ოკუპანტებმა და ცხინვალის დე ფაქტო რეჟიმის წარმომადგენლებმა ორი საგუშაგოს გახსნით უპასუხეს და ქართული მხარის მიერ კონტროლირებად ტერიტორიაზე 1.300 მეტრით შემოიჭრნენ.
"წაღვლი - ჩორჩანის ტყის მიმდინარე ოკუპაციის საკითხი 23 აგვისტოს შემდეგ,უკვე მეხუთედ იქნება განხილული 1 ოქტომბერს ერგნეთში.შეხვედრაზე რუსოსური მხარე კვლავ დააყენებს საკითხს ქართული "უკანონო" საგუშაგოს დემონტაჟთან დაკავშირებით.
ამასთან ერთად, ოკუპანტებმა წაღვლი-ჩორჩანის ტყის დაახლოებით 300 ჰექტარი წაგვართვეს.

შენიშვნა ტროლებისთვის და სამთავრობო აქტივისტებისთვის: წაღვლი-ჩორჩანის ტყე არასოდეს შედიოდა ცხინვალის რეგიონის ადმინისტრაციულ საზღვრებში და წინა მთავრობას არ "მიუხაზია" ცხინვალის რეგიონის ადმინისტრაციულ საზღვრებთან.

მიმდინარეობს ჩვენი, ახალი ტერიტორიების დათმობა რუსული საოკუპაციო რეჟიმისთვის.
ჩვენი ხელისუფლება კვლავ დაკავებულია ინფორმაციული ვაკუუმის შექმნით, რათა საზოგადოებამ ვერ აღიქვას ის კაპიტულანტური მოქმედებები, რომლებსაც ჩვენი მთავრობა ახორციელებს წაღვლი-ჩორჩანის ტყეში და მთლიანად სამაჩაბლოში.

საოკუპაციო რეჟიმის მიერ შექმნილი რუკით, ოკუპანტები უმიზნებენ თბილისი-გორის ავტობანის დაახლოებით ორმოცკილომეტრიან მონაკვეთს, გორს და მცხეთას. წაღვლი-ჩორჩანის ტყე მხოლოდ ტესტია...", - წერს დავით ქაცარავა.

შეგახსენებთ, დავით ქაცარავა თანამოაზრეებთან ერთად შიდა ქართლის საოკუპაციო ზოლზე 2017 წლის ივლისიდან პატრულირებს, ოკუპანტთა გადაადგილებასა და სხვა აქტივობას აკვირდება და სამოქალაქო პატრულირებასთან ერთად, კონფლიქტის ზონაში არსებული მდგომარეობის შესახებ ოპერატიულ ინფორმაციას ავრცელებს.

ამჟამად ორგანიზაციის წევრები და მოხალისეები ქარელის რაიონის სოფელ ატოცში არიან ბაზირებული, საიდანაც სხვადასხვა სოფლებში პატრულირებაზე გადიან. სწორედ მათი და სამოქალაქო საზოგადოების აქტივობის შედეგად ვერ შეძლეს ბორდერიზაციის გაგრძელება ოკუპანტებმა გასული წლის ნოემბერში, როცა ატოცში დამატებით ტერიტორიის მიტაცება სცადეს: აქტივისტების გამოჩენის შემდეგ მათ ბოძების ინსტალაცია შეწყვიტეს და არ განუახლებიათ, რადგან "ძალა ერთობაშია" ატოცში 24/7 რეჟიმში პატრულირებს, ამავე დროს საოკუპაციო ზოლთან პერიოდულად ტარდება სხვადასხვა შინაარსის საპროტესტო აქციები.