ყიფშიძის ქუჩაზე დაჭრილი ერთ-ერთი მამაკაცის მეუღლემ, მარიკა წერეთელმა "ნიუპოსტის" მიერ გავრცელებული ინფორმაცია დაადასტურა და ჟურნალისტებს უთხრა, რომ ვაკეში მომხდარი სისხლიანი დაპირისპირება ბიზნესსაქმიანობას უკავშირდება.
წერეთელი აღნიშნავს, რომ მას ყიფშიძეზე შეხვედრა ჰქონდა დანიშნული, თუმცა "კრიმინალები" დაახვედრეს.
„მე სულ სხვა ადამიანებთან მქონდა შეხვედრა დანიშნული და სულ სხვა ადამიანები მოვიდნენ. მაქვს ეჭვი, იმათი გამოგზავნილები არიან... ვითომ კაცები და მაგარი ბიჭები, როგორც ჩანს, ასე წყვეტენ საქართველოში ბიზნესის საქმეებს.
პირდაპირ მივმართავ კრიმინალებს, ეს ამბავი უნდა დამთავრდეს ერთხელ და სამუდამოდ საქართველოში. მე დღეს მომკლეს ჩემს ქმართან ერთად. ბოლომდე ვიბრძოლებ, რათა ეს ყველაფერი დამთავრდეს საქართველოში. მგონი კადრები ყველამ ნახეთ. არ ვიცნობ არავის, ვინც იყვნენ იქ. ერთადერთი ჩემი ფიქრი და გონება ის არის, გავიგო ჩემი მეუღლის მდგომარეობა და ველოდები. მე, როგორც ქალი, მოქალაქე, დედა, ვპირდები, პირდაპირ მივმართავ, მიყურებენ ალბათ ის კრიმინალები, არ ვაპატიებ. ამით წერტილი უნდა დაესვას საქართველოში ასეთ სიტუაციას, როცა დღისით, მზისით ადამიანს ქუჩაში ვერ გაუვლია“, – განაცხადა ერთ-ერთი დაჭრილი მამაკაცის მეუღლემ.
მარიკა წერეთელმა პოლიციას მის ხელთ არსებული ინფორმაცია მიაწოდა.
„დაკითხვაზე ვისაუბრე, პროცესი როგორ იყო. გამოძიებას მივაწოდე ინფორმაცია. ნაწილი მახსოვს, ნაწილი არა. ინციდენტის მომენტში არავინ დაუკავებიათ. ეჭვი, რა თქმა უნდა ვიღაცებზე მაქვს და ვვარაუდობ, ვის შეიძლება, გამოეგზავნა ეს ადამიანები. ეს ჩემი პირადი ბიზნესის თემაა. ვითომ კაცები და მაგარი ბიჭები, როგორც ჩანს, ასე წყვეტენ საქართველოში ბიზნესის საქმეებს“, - განაცხადა მარიკა წერეთელმა.
სისხლიანი დაპირისპირების დროს დაშავებულები ამ დრომდე კლინიკაში რჩებიან. მძიმეა მარიკა წერეთლის მეუღლე ის მკურნალობას რეანიმაციულ განყოფილებაში აგრძელებს. შედარებით მსუბუქია მეორე დაშავებულის მდგომარეობა, მას ტვინის შერყევა აღენიშნება.
მასალის გამოყენების პირობები