სერგეი ლავროვისა და დავით ზალკალიანის შეხვედრასთან დაკავშირებით რუსეთის საგარეო უწყება ოფიციალურ კომენტარს ავრცელებს.

უწყების განცხადებაში აღნიშნულია, რომ პირდაპირი და გულწრფელი საუბარი როგორც საქართველოს, ასევე რუსეთის მოსახლეობის ინტერესებში შედის.

"ყურადღება მივაქციეთ ნიუ-იორკში რუსეთის ფედერაციის საგარეო საქმეთა მინისტრის სერგეი ლავროვის თავის ქართველ კოლეგასთან გამართული შეხვედრის შემდეგ თბილისში ატეხილ ხმაურს. სამწუხაროდ, კვლავ გვესმის გაცვეთილი თეზისები „ოკუპაციის“ შესახებ. ამას გარდა, როგორც ჩანს, ჩვენი ქართველი კოლეგები შეშფოთებულები არიან არა იმდენად ამ მოლაპარაკებების შინაარსით და მიმართულებით, რამდენადაც პროტოკოლისა და ფორმატის საკითხებით.

ჩვენ დარწმუნებულები ვართ, რომ რუსეთისა და საქართველოს ხალხების ინტერესები პირდაპირ და გულწრფელ საუბარს საჭიროებს. ბოლო 12 წლის განმავლობაში ნიუ იოკრში გამართული ორი ქვეყნის საგარეო საქმეთა მინისტრების პირველი შეხვედრა ორიენტირებული იყო იმ რთული ვითარებიდან გამოსავლის ძიებაზე, რომელშიც აღმოჩნდა რუსულ-ქართული ურთიერთობები, მათ შორის მიმდინარე წლის ივნისი-ივლისის ცნობილი მოვლენების შედეგად" – აღნიშნულია რუსეთის საგარეო საქმეთა უწყების ოფიციალურ ვებგვერდზე გავრცელებულ განცხადებაში.

რუსეთის საგარეო უწყება ასევე მადლობას უხდის შვეიცარიას, რომელიც 11 წლის განმავლობაში წარმოადგენს რუსეთის ინტერესებს საქართველოში და საქართველოს ინტერესებს რუსეთში. განცხადებაში ასევე აღნიშნულია, რომ შვეიცარიის ხელშეწყობით გაიმართა ორი ქვეყნის საგარეო საქმეთა მინისტრების შეხვედრა.