ბიზნესდავა და ფულის გამოძალვა - ყიფშიძეზე სისხლიანი გარჩევის მოტივები

კრიმინალი - 18:07, 30 Sep, 2019

3579

ვაკეში მომხდარი სისხლიანი გარჩევა სავარაუდოდ ფულის გამოძალვას უკავშირდება. დაუდასტურებელი ინფორმაციით, მამაკაცები, რომლებიც ერთმანეთს დაუპირისპირდნენ, ბიზნესპარტნიორები არიან.

ადგილობრივების თქმით, დაპირისპირებას წინ ხმაური უსწრებდა. კონფლიქტში მინიმუმ სამი ადამიანი მონაწილეობდა, რომელთა შორის ერთი ქალია, რომელიც დაპირისპირებულების გაშველებას ცდილობდა.

ადგილობრიბის თქმით, ორი პირიდან ერთი ბარძაყშია დაჭრილი, მეორეს კი ჭრილობები თავსა და მუცელში აღენიშნება.

მედიკოსების ინფორმაციით, თავში დაჭრილი მამაკაცის მდგომარეობა მძიმეა, ის მეცხრე საავადმყოფოშია გადაყვანილი. მამაკაცს ნათით მიყენებული ჭრილობები აღენიშნება.

რაც შეეხება კონფლიქტში მონაწილე ქალს, ის პოლიციამ დაკითხვაზე გადაიყვანა.

როგორც გავარკვიეთ, აღნიშნული ქალი ბიზნესმენი მარიკა წერეთელია. "ასე წყვეტენ ბიზნესს" - კიოდა ქუჩური გარჩევისას ქალი.

როგორც "ნიუპოსტს" შინაგან საქმეთა სამინისტროში განუცხადეს, მომხდარზე გამოძიება "სისხლის სამართლის კოდექსის" 19-108 მუხლით დაიწყო, რაც განზრახ მკვლელობის მცდელობას გულისხმობს.

უწყება საქმეს იარაღის უკანონო შეძენა შენახვა ტარების მუხლითაც (236-ე მუხლის მე-3 და მე-4 ნაწილი) იძიებს.