ფარცხალაძის კვალი მერაბიშვილის საკნიდან გაყვანის საქმეში - თადუმაძის პირველი მოადგილე მძიმე კითხვების პირისპირ

პოლიტიკა - 13:52, 27 Sep, 2019

937

უზენაესი სასამართლოს მოსამართლეობის კანდიდატს, გენერალური პროკურორის პირველ მოადგილეს, მამუკა ვასაძემს ყოფილი შინაგან საქმეთა მინისტრის, ვანო მერაბიშვილის საკნიდან გაყვანის საქმეზე მოუწია განცხადევის გაკეთება.

„ევროპული საქართველოს“ დეპუტატი ოთარ კახიძე დაინტერესდა, მაშინ, როდესაც მამუკა ვასაძე 2014 წლის იანვარში საგამოძიებო სამსახურის უფროსად დაინიშნა, რატომ არ დაიწყო გამოძიება ვანო მერაბიშვილის სკანდალურ განცხადებაზე, რომ ის საკნიდან გაიყვანეს და ზეწოლა განახორციელეს მასზე ოთარ ფარცხალაძემ და დიმიტრი დარბაისელმა, რაზეც ვასაძემ უპასუხა, რომ მას არ ახსენდება საგამოძიებო ნაწილში კონკრეტული კორესპონდენციის შესვლა.

"მედიიდან გავრცელებული მასალაც. შეტყობინება დანაშაულის შესახებ არის გამოძიების საგანი. მიუხედავად იმისა, რომ ვალდებული იყავით დაგეწყოთ გამოძიება, ეს გამოძიება არ დაიწყეთ. ახლა არსებობს რაღაც ვარაუდი და ეჭვი, რომ თქვენი მეგობარი და კოლეგა იყო ამ დანაშაულში გარეული და არ დაიწყეთ გამოძიება. რამე სხვა მიზეზი ხომ არ გაქვთ, რატომაც გამოძიება არ დაიწყეთ?“- მიმართა კახიძემ ვასაძეს.

თავის მხრივ თადუმაძის პირველმა მოადგილემ განაცხადა, რომ „როგორც კი ცნობილი გახდა საგამოძიებო დანაყოფისთვის ამის შესახებ, გამოძიება დაიწყო და გამოძიებულ იქნა".

მისი თქმით, ამ სისხლის სამართლის საქმეზე შესწავლილ იქნა ყველა მტკიცებულება, რაც კი შეიძლება თეორიაში შესაძლებელი ყოფილიყო და პრაქტიკაშიც შესაძლებელი იყო მისი მოპოვება, მათ შორის ვიდეოჩანაწერებიც, შესაბამის ტრაექტორიაში რასაც ასახელებდნენ. „შემაჯამებელი გადაწყვეტილება მიიღეს, რომ ხსენებულ საქმეზე დანაშაულის ნიშნები ვერ დადგინდა. როდის მივიღეთ ეს გადაწყვეტილება თარიღის გახსენება არ შემიძლია“, - განაცხადა ვასაძემ.

„სასამართლო დიდი პალატის გადაწყვეტილებაში აღნიშნავს, რომ თქვენ არ ამოიღეთ შესაბამისი ვიდეოჩანაწერები და სასამართლოს განუცხადეთ, რომ წაშლილი იყო ეს ჩანაწერები, მტკიცებულება პრაქტიკულად განადგურდა, ამბობს სასამართლო. გამოძიების ფარგლებში ოთარ ფარცხალაძისთვის პასუხისმგებლობის ასარიდებლად თქვენ რაიმე შემხებლობა გქონდათ ამ კადრების განადგურებასთან?“ - ჰკითხა კახიძემ ვასაძეს.

„მქონდა თუ არა კადრების განადგურებასთან და დანაშაულთან რაიმე შემხებლობა, ეს სცდება კორექტულობის ნაწილს. ყველა ვიდეომტკიცებულება, რომელიც შეიძლებოდა ამოღებულიყო, ამოღებულია ჯერ კიდევ მაშინ, როდესაც გენერალური ინსპექცია იკვლევდა ამ საკითხს და ამ ქმედებას. გადაადგილების მარშრუტის ჩანაწერებს რაც შეეხება, ეს ვიდეოჩანაწერები არ არის განუსაზღვრელი ვადით და მუდმივად, რაღაც კონკრეტული ვადები აქვს. ჩანაწერები, რაც სისხლის სამართლის საქმეში მოიპოვება იმ გადაადგილების ტრაექტორიაში, რაც განმცხადებელმა განაცხადა, ამოღებულია და ექსპერტიზაც ჩატარებულია. თუმცა, ვერ იქნა საეჭვო გარემოება გამოვლენილი და ვერ დადგინდა განცხადების მართებულობა, რასაც განმცხადებელი აცხადებდა....გარდა იმისა, რომ ხელის დაფარებას ჰქონდეს ადგილი, კითხვები არსებობს იმასთან დაკავშირებითაც, გამოძიება რამდენად ხარისხიანად აწარმოეთ. გარდა ამისა, თქვენ იმ მტკიცებულებით, რომელიც სასამართლოს წარუდგინეთ დაადასტურეთ, რომ პენიტენციურ დაწესებულებასაც და ადგილს შორის, სადაც ოთარ ფარცხალაძე იმყოფებოდა მანძილი რამდენიმე ასეული მეტრი იყო“, - განაცხადა კახიძემ.

„გამოძიებას სხვა მტკიცებულებების მოპოვების მიზნით აწარმოებს სხვა დანაყოფი. შესაბამისად, რა გადაწყვეტილება იქნება მიღებული, ამის წინასწარ განჭვრეტა შეუძლებელია. რაც შეეხება თქვენს მიერ ჩამოთვლილ მტკიცებულებებს, მე ამის ჩამოთვლა ფიზიკურად არ შემიძლია“, - განაცხადა ვასაძემ.

„ჯერ გამოძიება არ დაიწყეთ 2014 წლის იანვარში, შემდეგ წაიშალა მტკიცებულებები, რომელიც ამას ადასტურებდა; სტრასბურგმა როდესაც გაამტყუნა სახელმწიფო და თქვა, რომ ადგილი ჰქონდა მერაბიშვილის გაყვანას საკნიდან ფარცხალაძის ფიგურანტობით, იძულებული გახდით გამოძიება დაგეწყოთ. დღემდე არ გყავთ ფიგურანტი დაზარალებულად ცნობილი. ამის შემდეგ რა შეიძლება ჩვენ ვიფიქროთ, როგორც პარლამენტის დეპუტატებმა, გნებავთ ოპოზიციიდან, გნებავთ უმრავლესობიდან, რომ თქვენ მართლა მიუკერძოებლად იცავდით კანონს და ამოწმებდით ყველა მტკიცებულებას, თუ თქვენი მეგობრის ოთარ ფარცხალაძის დაცვით იყავით დაკავებული პროკურატურაში“, - განაცხადა კახიძემ.