"ავიღე ჯოხი და პოლიციელს ჩავარტყი" - სროლა და დაშავებული სამართალდამცავი ბოდბისხევში

შემთხვევა - 18:47, 26 Sep, 2019

2262

კახეთში, სოფელ ბოდბისხევში სამართალდამცვებს თავს დაესხნენ. არსებული ინფორმაციით, საქმეში ფიგურირებს ცეცხლსასროლი იარაღი და ნაჯახი.

ადგილობრივების თქმით, ერთ-ერთმა პოლიციელმა მოქალაქე მამუკა ყაჭრიშვილის დაკავება სცადა, რა დროსაც შს სამინისტროს წარმომადგენელს მამაკაცის ოჯახი ფიზიკურად გაუსწორდა. პოლიციელს დაზიანება ჯოხით მიაყენეს.

მამუკა ყაჭრიშვილის დედა ირწმუნება, რომ პოლიცია მის შვილს ფიზიკურად უსწორდებოდა რა დროსაც ყაჭრიშვილის დახმარება ოჯახმა და მეზობლებმა სცადეს.

ყაჭრიშვილმა მიმალვა მოახერხა. პოლიციამ კი ბრალდებულის 83 წლის მამა დააკავა.

"ჩემი შვილი იძახდა მკვევენო... ერთი პოლიციელი ურტყამდა. მეც ავიღე ჯოხი და პოლიციელს ჩავარტყი"- აცხადებს მამაკაცის დედა.

არსებული ინფორმაციით, ყველაფერი გუშინ დაიწყო, როცა მამუკა ყაჭრიშვილმა ერთ-ერთ სამართალდამცავს რესტორნის მიმდებარე ტერიტორიაზე ცეცხლი გაუხსნა, დღეს კი შს სამინისტროს წარმომადგენლები მასთან დაკავების მიზნით გამოჩნდნენ.

შინაგან საქმეთა სამინისტროში კი აცხადებენ, რომ სამართალდამცავების ფიზიკური შეურაცხყოფის ბრალდებით 1936 წელს დაბადებული მამაკაცი დააკავეს.

გომელაურის უწყებაში აცხადებენ, რომ ავტომობილის შემოწმებისას დაკავებულის შვილი სამართალდამცავების მითითებებს არ დაემორჩილა, ხოლო მისმა მშობელმა მათ წინააღმდეგობა გაუწია.

შს სამინისტროს ინფორმაციით, შემთხვევის შედეგად, ამოღებულია ცეცლსასროლი იარაღი, რომელიც დაკავებულის შვილმა მეზობლის ეზოში გადააგდო, ხოლო თავად ადგილიდან მიიმალა.

რაც შეეხება სამართალდამცავთა ჯანმრთელობას, მათ მძიმე დაზიანებები არ აღენიშნებათ, თუმცა ფაქტის გამო, პირველადი სამედიცინო დახმარება დასჭირდათ.

ფაქტთან დაკავშირებით გამოძიება მიმდინარეობს 253 პრიმა მუხლით. ასევე, 353-ე პრიმა მუხლის პირველი ნაწილით, რაც სამართალდამცავებზე თავდასხმას გულისხმობს. გამოძიება ასევე მიმდინარეობს 236-ე მუხლის მესამე ნაწილით, რაც ცეცხლსასროლი იარაღის უკანონო შეძენა-შენახვას გულისხმობს.