ხურჩაში დაჭრილი პოლიციელის ოჯახი: კონფლიქტი იყო თუ არ იყო, მაინც ხელმძღვანელობაა დამნაშავე

პოლიტიკა - 13:36, 26 Sep, 2019

871

აფხაზეთის რეგიონის საოკუპაციო ხაზთან მდებარე სოფელ ხურჩაში, საგუშაგოზე დაჭრილი პოლიცელის კობა გეთიას ოჯახის წევრები მომხდარში პასუხისმგებლობას ჯარისკაცის ხელმძღვანელებს აკისრებენ.

"სასაზღვრო პოლიციაში სავალდებულო სამსახურს იხდიდა. 5-6 დღეში ამთავრებდა და დაიჭრა კიდეც. თუ როგორ დაიჭრა, ეს ჩვენთვის უცნობია. კონფლიქტს ჰქონდა იქ ადგილი თუ თვითონ დაიჭრა, ნებისმიერ შემთხვევაში ეს ხელმძღვანელობის პასუხისმგებლობის საკითხს აყენებს, რადგან უსაფრთხოების წესები დაცული არ ყოფილა. ვითხოვ, დადგეს ხელმძღვანელი პირების პასუხისმგებლობის საკითხი. ოჯახს კი კომპენსაცია მისცენ. ახალგაზრდა საღსალამათი იყო, ახლა კი მეორე ოპერაცია შეიძლება დასჭირდეს. ზუგდიდის რეფერალურ ჰოსპიტალში ერთი, ურთულესი ოპერაცია უკვე გაკეთებულია"- აცხადებს დაშავებული წვევამდელის ახლობელი.

კობა გეთიას ბებიას თქმით, დაშავებულს ტყვია ფეხში აქვს მოხვედრილი.

"ფეხში აქვს ტყვია მოხვედრილი, დამტვრეული აქვს ძვალი"- აცხადებს დაჭრილის ბებია.

განსაკუთრებულ დავალებათა დეპარტამენტის ჯარისკაცი, 20 წლის კობა გეთია გუშინ დაიჭრა.

არსებული ინფორმაციით, ახალგაზრდას იარაღი გაუვარდა. წვევამდელს ტყვია ფეხში აქვს მოხვედრილი. მას ზუგდიდის რეფერალურ საავმდყოფოში გადაუდებელი ოპერაცია ჩაუტარდა.

შინაგან საქმეთა სამინისტროს ცნობით, გამოძიება 124-ე მუხლით მიმდინარეობს, რაც გაუფრთხილებლობით ჯანმრთელობის დაზიანებას გულისხმობს.