სოფელ ჩორჩანის ტყეში, სადაც ბოლო ორი კვირის განმავლობაში რუსმა ოკუპანტებმა ორი ბლოკ-პოსტი გამართეს, რუსული საინჟინრო ტექნიკა, ჩორჩანის თავზე კი - ოკუპანტთა ვერტმფრენი გამოჩნდა.

ფოტომასალა ექსკლუზიურად „ნიუპოსტს“ ანტიოკუპაციური მოძრაობა „ძალა ერთობაშიას“ წარმომადგენლებმა მიაწოდეს.

მოძრაობის ლიდერმა დავით ქაცარავამ, რომლის გუნდი შიდა ქართლის საოკუპაციო ზოლზე 2017 წლის ივლისიდან უწყვეტი სამოქალაქო პატრულირებითაა დაკავებული, "ნიუპოსტს" უთხრა, რომ დილიდან ოკუპირებული ჩორჩანის ტყეში რუსი ოკუპანტების კუთვნილი საინჟინრო ტექნიკა, კერძოდ, სამხიდიანი სატვირთო მანქანა გამოჩნდა, მოგვიანებით კი, სავარაუდოდ, ოკუპირებული წნელისიდან აფრენილმა რუსულმა სამხედრო ვერტმფრენმა ქართული მხარის მიერ კონტროლირებად ტერიტორიას გადაუფრინა, ჩორჩანას წრე დაარტყა და ცხინვალის მიმართულებით გაფრინდა:

„სამუშაოები ჩორჩანის ტყეში ერთი წუთითაც არ წყდება. ცხინვალის დე ფაქტო ძალოვნები ოცდაოთხსაათიან რეჟიმში მუშაობენ, ხოლო რუსი ოკუპანტები მათ ნამუშევარს ვერტმფრენებით აკონტროლებენ და ალბათ, შექებასაც არ დაინანებენ გულმოდგინე საქმიანობისთვის.

ჩვენი ხელისუფლება არათუ ხელს არ უშლის ამ მოქმედებებს, არამედ საერთოდაც, დუმილს არჩევს, რასაც არანაირი ახსნა არა აქვს“, - აცხადებს დავით ქაცარავა.

შეგახსენებთ, აგვისტოს ბოლოს ოსურმა მხარემ პრეტენზია გამოთქვა ჩორჩანაში, წნელისის ადმინისტრაციულ საზღვართან, ტყის ზოლზე ქართული პოლიციის სტაციონარული საგუშაგოს აგების გამო, მოგვიანებით კი ამის საპირწონედ ჩორჩანის სიღრმეში, ასევე ტყის ზოლზე ორი სტაციონარული საგუშაგო გამართა, რითაც 1.300 მეტრით შემოიჭრა ქართული მხარის მიერ კონტროლირებად ტერიტორიაზე. ამის შესახებ ინფორმაცია თავდაპირველად სწორედ დავით ქაცარავამ და მისმა მეგობრებმა გაავრცელეს, მოგვიანებით კი ინფორმაცია ევროკავშირის სადამკვირვებლო მისიის წარმომადგენლებმაც დაადასტურეს.