მცხეთაში საკონსტიტუციო ცვლილებების საყოველთაო განხილვა მიმდინარეობს. დისკუსიაში პარტიები, კონსტიტუციონალისტები და მესამე სექტორის წარმომადგენლები მონაწილეობენ.

განხილვის მთავარი საკითხი არის მმართველი გუნდის მიერ მომზადებული საკონსტიტუციო ცვლილებები, რომლის მიხედვითაც 2020 წელს საპარლამენტო არჩევნები პროპორციული სისტემით, ნულოვანი ბარიერით ჩატარდება.

ოპოზიცია არჩევნების 3%-იანი ბარიერით ჩატარებას და საარჩევნო ბლოკების დაშვებას ითხოვს, რასაც მმართველი პარტია არ ეთანხმება. მათი განცხადებით, ყველა პარტიამ თავისი ძალები დამოუკიდებლად უნდა მოსინჯოს.

საკონსტიტუციო ცვლილებების საყოველთაო განხილვა ჯამში 11 ქალაქში არის დაგეგმილი. მცხეთის შემდეგ დისკუსიის მონაწილეები გორში გადაინაცვლებენ, სადაც საყოველთაო განხილვა 17:00 საათზე დაიწყება.