პოლიტიკური მოძრაობა „ტრიბუნას“ დამფუძნებელი, ისნის დამოუკიდებელი მაჟოიტარი დავით ჭიჭინაძე მამუკა ხაზარაძის განცხადებების შეფასებისას ამბობს, რომ პოლიტიკოსი, რომელიც შანტაჟს ექვემდებარება, პოლიტიკურად დამთავრებულია.

„დღეს თუ ივანიშვილი აშანტაჟებს, ხვალ ქვეყნის მტერი დააშანტაჟებს,“ - აცხადებს ჭიჭინაძე.

მისივე თქმით, ყოფილ პრემიერს, გიორგი კვირიკაშვილს ბიძინა ივანიშვილი ძალიან ენდობოდა, მაგრამ როგორც კი კვირიკაშვილი პრემიერი გახდა, აქტიურად შემოიყვანა თამაშში მამუკა ხაზარაძე და ბევრი ნაბიჯი გადადგა სწორედ ხაზარაძის სასარგებლოდ.

„საპენსიო რეფორმა, მოგების გადასახადი, იგივე ანაკლიის პორტი დაუსაბუთებელი ეკონომიკური გათვლებით და დასახელებული არადეკვატური თანხებით, - ყველაფერი ეს იქითკენ იყო მიმართული, რომ ბანკებს ის ერთი გადასახადიც უუქმდებოდათ, რითაც არიან დატვირთულნი. თავად ხაზარაძეც აცხადებდა, რომ მზად იყო საპენსიო რეფორმის თანხები თავის ბანკში განეთავსებინა და სახელმწიფოსთვის დაერიცხა სარგებელი, მაგრამ დღეს, როდესაც მთელი მსოფლიოს ბანკები მინუსის პროცესში არიან გადასულნი და ფულს იქით ქვითავენ კორპორაციებთან, ჩვენ სად ვაპირებდით ამ საპენსიო რეფორმის თანხის განთავსებას და ის რა მოგებას მოგვიტანდა, მით უმეტეს, 30 წლის მერე ვინ მიიღებდა ამ ფულს, ძალიან საეჭვოა.

მოკლედ, ძალიან ბევრი ისეთი ნაბიჯი გადაიდგა, რომელიც ჩვენს ეკონომიკას არ ადგება.

მართალია, დღეს ჩვენ ეს ფული ამოვიღეთ ეკონომიკიდან, მაგრამ სად არის წასული, როგორ იზრდება, არავინ იცის. ვიცით მხოლოდ ის, რომ საპენსიო ფონდის ხელმძღვანელობა დიდ ხელფასს იღებს,“ - აცხადებს დავით ჭიჭინაძე.