რუსთავში ცხვირის ოპერაციამდე, ნარკოზის გაკეთების შემდეგ გარდაცვლილი 19 წლის გოგონას ოჯახი, მომხდარში ექიმებს ადანაშაულებენ. როგორც ირკვევა, ახალგაზრდა წარმოშობით სენაკიდანაა და ის თბილისში სწავლობდა.

გოგონას ბებია ფლორა შენგელია აცხადებს, რომ მის შვილიშვილი სრულიად ჯანმრთელი იყო.

"არანაირი გულის პრობლემა არ ჰქონდა... დიდი დოზა ნარკოზის ბრალია. ოპერაცია არ იყო დაწყებული, იქამდე გარდაიცვალა“, - განაცხადა გარდაცვლილის ბებიამ.

რუსთავის ცენტრალური საავადმყოფოს დირექტორის მოადგილე დავით გოგოძე ამბობს, რომ 19 წლის გოგონას გარდაცვალების მიზეზი ანაფილაქსიური შოკი გახდა, რომელიც ორგანიზმში ნოვოკაინის შეყვანისთანავე განვითარდა.

მისივე თქმით, ოპერაციის დაწყებამდე პაციენტს მედიკამენტებზე შესაბამისი სინჯი ჩაუტარდა და შედეგები ოჯახის წევრებსაც გააცნეს.

საავადმყოფოს დირექტორის მოადგილის ინფორმაციით, გოგონას რეანიმირებას 9 საათი ცდილობდნენ, მაგრამ მისი გადარჩენა ვერ მოხერხდა.

" ანესთეზიის შეყვანისთანავე განვითარდა მძიმე ანაფილაქსიური შოკი. სამწუხაროდ მდგომარეობიდან გოგონას გამოყვანა ვერ მოხერხდა. ოპერაცია დაწყებული არ იყო, წინასწარ სინჯი რა თქმა უნდა, გაკეთდა - არაფერზე რეაქცია არ ჰქონდა.

სამწეუხაროდ, არ არსებობს გარანტია, რომ შოკი არ განვითარდება.

უშუალოდ ნოვოკაინის შეყვანაზე დაეწყო შოკი. პირდაპირ ნემსის შეყვანისთანავე დაიწყო. პირველივე წვეთიდან. დაახლოებით 10 საათის განმავლობაში გაგრძელდა ", - განაცხადა დავით გოგოძემ.