"ყველას უნდა ახსოვდეს პროკურატურაში, რომ ეს ყველაფერი არ დარჩება შეუმჩნეველი შემდეგი ხელისუფლებისთვის" - ნიკა მელია "გავრილოვის ღამეს" დაკავებულებზე ზეწოლას ეხმაურება

პოლიტიკა - 18:32, 17 Sep, 2019

772

ოპოზიციის განცხადებით, პროკურატურა 20 ივნისის საქმეზე დაკავებულებზე ზეწოლას ახდენს იმისთვის, რომ მათთვის სასურველი ჩვენებები მოიპოვონ და პოლიტიკური ლიდერები, რომლებიც 20 ივნისის ღამეს საქართველოში გავრილოვის ჩამოსვლას მომიტინგეებთან ერთად აპროტეტესტებდნენ, ციხეში გამოკეტონ. ოპოზიციის ერთ-ერთი ლიდერის, ენმ-ს პოლიტსაბჭოს თავმჯდომარის ნიკა მელიას თქმით, ხელისუფლებამ პოლიტიკურ გადატრიალებად გაასაღა საქმე, რომელსაც არანაირი სამართლებრივი საფუძველი არ აქვს. თუმცა როგორც ნიკა მელია ამბობს, პროკურატურის წარმომადგენლებს უნდა ახსოვდეთ, რომ მათი ეს დანაშაულებრივი ქმედება შეუმჩნეველი არ დარჩება შემდეგი ხელისუფლების პირობებში.

„ხელისუფლებამ ის არ იკმარა, რომ თავიდან ბოლომდე შეკერა ეს საქმე და სახელმწიფო გადატრიალებად გაასაღა სისხლის სამართლის საქმე, რომელსაც არანაირი სამართლებრივი საფუძველი არ აქვს, ხალხი უბრალოდ არაფრის გამო დააპატიმრა და ყავს ციხეში გამოკეტილი. ახლა უზნეო, ამორალურ და რაც მთავარია მძიმე დანაშაულს ჩადის, როცა ზეწოლას ახორციელებს რამდენიმე დაკავებულზე, რომ იქნებ რამენაირად წაგლიჯონ მათ ჩვენება, რომელიც თითქოს ამხელს ირაკლი ოქრუაშვილს, ან მე, ან რომელიმე ლიდერს, თითქოს ეს ყველაფერი შეთანხმებული იყო. ერთი რამე ყველას უნდა ახსოვდეს ვინც ახლა პროკურატურაში მუშაობს, რომ ეს ყველაფერი არ დარჩება შეუმჩნეველი შემდეგი ხელისუფლებისთვის“- განაცხადა ნიკა მელიამ.