"ევროპული საქართველო" პროდასავლური ოპოზიციური პარტიებისგან საჯარო პირობას ელოდება, რომ ივანიშვილთან კოალიციას არ შექნიან

პოლიტიკა - 12:13, 14 Sep, 2019

875

"ევროპული საქართველოს" წევრი, სერგი კაპანაძე პარტია "კანონი და სამართლის" ლიდერის, თაკო ჩარკვიანის განცხადებას ეხმაურება.

საუბარია თაკო ჩარკვიანის იმ განცხადებაზე, სადაც მან ოპოზიციური პარტიებისადმი "ევროპული საქართველოს" შეთავაზება შეაფასა.

„გუშინ ევროპული საქართველო და თავისუფალი დემოკრატები ინიციატივით გამოვედით, რომ ყველა პროდასავლურმა ოპოზიციურმა პარტიამ 2020-ის საპარლამენტო არჩევნებამდე საჯაროდ დადოს პირობა, რომ არ შევა ბიძინა ივანიშვილთან და პროპუტინურ ძალებთან კოალიციაში და ამით არ შეუწყობს ხელს ივანიშვილისთვის ძალაუფლების შენარჩუნებას.

ევროპული საქართველო და თავისუფალი დემოკრატები მივიჩნევთ, რომ ეს არასაკმარისი მაგრამ აუცილებელი პირობაა ქვეყნის წინ წასასვლელად. მიგვაჩნია, რომ ჩვენი ქვეყნის ეროვნული ამოცანაა ივანიშვილის და პროპუტინური ძალების ძალაუფლებიდან ჩამოშორება.

ამ მოწოდებას მოყვა სრულიად აგრესიული რეაქცია ივანიშვილის გუნდისგან და მისი სატელიტებისგან. რაც მოულოდნელი არ ყოფილა.

ინიციატივას თითქმის ყველა პროდასავლური პარტია გამოეხმაურა. მათი უმრავლესობა, სხვა საკითხებში არსებითი განსხვავების მიუხედავად, იზიარებს ამ სასტარტო პირობის აუცილებლობას ქვეყნის თავისუფლების დაცვისთვის. იყო კრიტიკაც ჩვენს მიმართ, რაც აბსოლუტურად ნორმალურია.

ამავდროულად, მოვისმინეთ ,,ძალა ერთობაშია" კოალიციის ერთ-ერთი ლიდერის თაკო ჩარკვიანის განცხადება, რომელიც სავსე იყო ტყუილითა და ცილისწამებით ასავალ-დასავალის და ქართული ოცნების სტილში.

აღსანიშნავია რომ ნაციონალური მოძრაობის გარშემო გაერთიანებული ,,,ძალა ერთობაშია " კოალიციის ერთ-ერთი ლიდერის განცხადება ჩვენი ინიციატივის კრიტიკას კი არ წარმოადგენდა, ან თუნდაც მწვავე შეფასებას, არამედ იყო ბინძური და აბსურდული ცილისწამება, თითქოს ივანიშვილთან კოალიციის არშექმნაზე პირობის დადება ივანიშვილის ინტერესებს ემსახურება.

ჩარკვიანი კოალიციის ერთ-ერთი სპიკერია, შესაბამისად ევროპული საქართველო მოვითხოვთ ნაციონალური მოძრაობის და კოალიციის სხვა ლიდერებისგან მკაფიო პოზიციოს დაფიქსირებას ამ ბინძურ ცილისწამებაზე.

მათ უნდა დააფიქსირონ ემიჯნებიან და გმობენ ამ განცხადებას, თუ ეთანხმებიან მის პათოსს, ან თუნდაც დუმილს ირჩევენ ჩარკვიანის საქციელთან დაკავშირებით, რაც ამ შემთხვევაში ამ გზავნილთან თანხმობის ნიშანია. ევროპული საქართველოს პოზიცია ყველასთვის ცნობილია - მწვავე დისკუსია და კრიტიკა პოლიტიკური პროცესის აბსოლუტურად ნორმალური ნაწილია ჩვენსა და ენმ-ს შორის უზარმაზარი განსხვავებებაა ბევრ პოლიტიკურ საკოთხში. ვაპირებთ მათ აქტიურ კრიტიკას, თუმცა არ ვაპირებთ ტალახის სროლასა და ცილისწამებას. ამისკენ მოვუწოდებთ ყველას და მათ შორის პირველ რიგში ენმ-ს და მათთან აფილირებულ ძალებს.“ - აცხადებს სერგი კაპანაძე.