"ხაზარაძემ გამოძიება ჩიხში შეიყვანა, არ წარმოადგინა „წერილის“ ორიგინალი და არც შუამავალი დაასახელა"- პროკურატურის პოზიცია "მუქარის წერილზე"

პოლიტიკა - 17:49, 11 Sep, 2019

1134

თადუმაძის უწყებაში ამბობენ, რომ ე.წ. „მუქარის წერილზე“ გამოძიება თავად მამუკა ხაზარაძემ შეიყვანა ჩიხში, როდესაც არ წარადგინა წერილის დედანი.

მათივე თქმით, ე.წ. „წერილის“ იდენტიფიცირების კუთხით თუ იქნება გარკვეული პროგრესი, პროკურატურა დაუყოვნებლივ მოახდენს სამართლებრივ რეაგირებას.

„მამუკა ხაზარაძის მიერ წარმოდგენილი ე.წ. წერილი დოკუმენტის სახით დაუყოვნებლივ დაერთო მოქმედ სისხლის სამართლის საქმეს, რაც პროცესუალურად ნიშნავს, რომ მასზე გამოძიება დაწყებულია და გრძელდება. გამოძიების ეს ეპიზოდი ჩიხში შეიყვანა თავად მამუკა ხაზარაძემ, რომელმაც არ წარმოადგინა არც „წერილის“ ორიგინალი და სასამართლოში გამოკითხვისას არ დაასახელა შუამავალი. შესაბამისად, როგორც პროკურატურამ უკვე არაერთხელ განმარტა, გამოძიება მოკლებული იყო შესაძლებლობას, მოეხდინა ე.წ. წერილის იდენტიფიცირება. თუ ამ კუთხით იქნება გარკვეული პროგრესი, რაც თავის მხრივ დამოკიდებულია მამუკა ხაზარაძის პოზიციაზე, საქართველოს პროკურატურა დაუყოვნებლივ მოახდენს სამართლებრივ რეაგირებას“, - განაცხადეს პროკურატურაში.