"საშვები ავტომატურად ავიღეთ ყველას სახელზე, მაკომ კითხვა გამოგზავნა, შედით და ჩემი სახელით დაუსვითო" - შოთა დიღმელაშვილის განმარტება მაკო გომურის საშვზე

პოლიტიკა - 14:34, 06 Sep, 2019

928

აქცია „სირცხვილიას“ ერთ-ერთმა ორგანიზატორმა შოთა დიღმელაშვილმა განმარტება გააკეთა იმასთან დაკავშირებით, თუ რატომ იყო პარლამენტში შესასვლელი საშვი დაშვებული მაკო გომურზეც, რომელიც თბილისში არ იმყოფებოდა. აღნიშნული თემა აქტუალური მას შემდეგ გახდა, რაც ენმ-მ პრემიერ-მინისტრობის და მინისტრობის კანდიდატებთან შეხვედრა იმ მიზეზით ჩაშალა, რომ პარლამენტში არ უშვებდნენ „სირცხვილიას“ აქციის მონაწილეებს, მათ შორის მაკო გომურსაც. დიღმელაშვილის თქმით, საშვები აქციის რამდენიმე მონაწილეზე დააშვებინეს იმ იმედით, რომ რომელიმე მაინც შეაღწევდა და შეკითხვენს დაუსვამდა გიორგი გახარიას:

„4 დღეა სისტემამ გაჭედაო ამბობენ, ბუნებრივია ვიცოდით, გაგვიჭირდებოდა შესვლა. საშვები ავტომატურად ავიღეთ ყველას სახელზე მოძრაობიდან, იმ იმედით, რომ ვიღაც შეაღწევდა, მაგრამ ყველანი იმათგან, ვის სახელზეც გავაკეთებინეთ საშვები, არ ვართ პარლამენტთან. მეც არ ვარ ახლა პარლამენტთან და ჩემზეცაა საშვი. გუშინ გვიან ღამე გავიგეთ, რომ მაკო მიდიოდა, ღამის ორისკენ. მაგრამ კითხვა გამოგზავნა, შედით და ჩემი სახელით დაუსვითო. ამას ვაპირებდით თუ გამოგვივიდოდა შეღწევა, მაგრამ დიდი იმედი არ გვქონდა, მეოთხე დღეა "სისტემამ გაჭედა" და ორშაბათს დაიწყო ეს ჭიდაობა.

ცუდია, რომ ამგვარი მისკომუნიკაციის საფუძველი შეიქმნა, რაც სახელისუფლებო მედიას ასეთი სპინის საშუალებას მისცემს. ჩვენი შეცდომაა, ტვინი უნდა დაგვეტანებინა, მაგრამ ეს ტვინებიც 78 დღე ქუჩაში დგომის შემდეგ, აქციის მერე, ღამის ორ საათზე, ისე კარგად აღარ მუშაობს.“- წერს შოთა დიღმელაშვილი ფეისბუკზე.