ლევან თევზაძემ უზენაესი სასამართლოს მოსამართლეობაზე წარდგენილი თავისი კანდიდატურა მოხსნა

პოლიტიკა - 16:30, 04 Sep, 2019

739

მოსამართლე ლევან თევზაძემ უზენაესი სასამართლოს მოსამართლეობაზე წარდგენილი თავისი კანდიდატურა მოხსნა. ამასთან დაკავშირებით მან განცხადება გაავრცელა, რომელშიც აღნიშნავს, რომ ის კანდიდატობის ყველა კრიტერიუმს აკმაყოფილებს, თუმცა მიზანშეწონილად მიიჩნევს კანდიტატობის მოხნის თაობაზე მიმართოს იუსტიციის უმაღლეს საბჭოს:

„როგორც საზოგადობისათვის ცნობილია, საქართველოს იუსტიციის უმაღლეს საბჭოში მიმდინარეობს უზენაესი სასამართლოს წევრთა შერჩევის პროცესი. შერჩევის პროცესში კონკრეტულმა პირებმა, მათ შორის, იუსტიციის უმაღლესი საბჭოს ზოგიერთმა არამოსამართლე წევრმა, საზოგადოებას მიაწოდეს მცდარი ინფორმაცია თითქოს საბჭოს წევრ ირაკლი შენგელიასთან ჩემი ნათესაური კავშირი აცილების საფუძველს წარმოადგენდა, რაც პროცესის მიზანმიმართული დისკრედიტაციაა. ორგანული კანონით პირდაპირ არის განსაზღვრული აცილების კონკრეტული საფუძვლები, რაც ჩემს შემთხვევას საერთოდ არ ეხება.

მიმაჩნია, რომ უზენაესი სასამართლოს მოსამართლისთვის დადგენილ ყველა კრიტერიუმს ვაკმაყოფილებ და მაქვს ლეგიტიმური უფლება, მონაწილეობას ვიღებდე კონკურსში, თუმცა მხედველობაში მივიღე მიმდინარე პროცესის მნიშვნელობა სასამართლო სისტემისთვის და მიზანშეწონილად მივიჩნიე, მიმემართა იუსტიციის უმაღლესი საბჭოსათვის კანდიდატურის მოხსნის თაობაზე, რათა ჩრდილი არ მიადგეს ამ ისტორიულ პროცესს.“- აღნიშნულია განცხადებაში.