„გახარიას გაპრემიერება - სილის გარტყმა საზოგადოებისთვის“ - „ოცნების“ ოფისთან „სირცხვილიას“ წევრების მივიდნენ

პოლიტიკა - 09:35, 03 Sep, 2019

1014

„ქართული ოცნების“ ცენტრალურ ოფისთან, სადაც პოლიტსაბჭოს სხდომა დლის 9 საათზე დაიწყო, აქცია „სირცხვილიას“ წარმომადგენლები მივიდნენ.

აქციის მონაწილეები გიორგი გახარიას შესაძლო გაპრემიერებას აპროტეტებენ და ამბობენ, რომ მთავრობის ასეთი ცვლილება საზოგადოების პროტესტს კიდევ უფრო გააღრმავებს.

„დაიწყო შემოდგომა და ჩვენ დაპირებისამებრ, უფრო მეტად გავაქტიურდებით. ჯერ დილაუთენიაა და „ქართული ოცნება“ ზრუნავს იმაზე, რომ ჩვენ მოვასწროთ ჯერ მათ ოფისთან მოსვლა და გაპროტესტება იმის, რაც აქ ხდება და შემდეგ უკვე პარლამენტთან, რომლის ყველა შესასვლელთან სირცხვილის კორიდორი გაკეთდება. დღეს აქაც მოდიან „სირცხვილიას“ წარმომადგენლები და ადამიანები, ვისაც უბრალოდ უნდოდა, რომ აქედან დაეძახა სათქმელი, რომ სირცხვილია და 76-ე დღეს მაინც იქნებ გონივრული გადაწყვეტილება მიიღოს მთავრობამ, რომელიც აქ იქნება შეკრებილი. მასზე იქნება დამოკიდებული, როგორ გაგრძელდება ხვალ და ზეგ ჩვენს ქვეყანაში სიტუაციები. ჩვენ ვადასტურებთ, რომ მზად ვართ ყველა ფრონტზე, რომელიც ბიძინა ივანიშვილმა გახსნა, ვიყოთ აქტიური და პასუხი გავცეთ. „ქართული ოცნება“ უნდა მიხვდეს, რომ 76-ე დღესაც კი არ შევშინებულვართ, არ დავღლილვართ და კიდევ უფრო მეტი ვიქნებით.

გახარიას გაპრემიერება ქართული საზოგადოებისთვის იდეურად იქნება კიდევ ერთი სილის გარტყმა. ეს იქნება ბიძინა ივანიშვილისგან პიდაპირი სიგნალი და განაცხადი, რომ საერთოდ არ აინტერესებს, რას აპროტესტებს ხალხი. ეს იქნება პირდაპირი განაცხადი იმისა, რომ იწყება კიდევ უფრო აქტიურ ფაზაში დიქტატურა, ზუსტად ის, რაც ხდება კორეასა და რუსეთში. ბუნებრივია, ამას უფრო მეტი გაღიზიანება მოჰყვება ადამიანებისგან. თუ გახარია გახდა პრემიერ-მინისტრი, ეს კიდევ უფრო აწევს ტემპერატურას „ქართული ოცნების“ წინააღმდეგ,“ - განაცხადა გიგა მაქარაშვილმა.