მოძრაობა „ტრიბუნას“ ლიდერი, ისნის დამოუკიდებელი მაჟორიტარი დავით ჭიჭინაძე მიიჩნევს, რომ ივანიშვილთან დაახლოებული გავლენიანი პირი აშშ-სთან მხოლოდ ახალი პრემიერის ვინაობას კი არა, არამედ, „ოცნების“ ყოფნა-არყოფნის საკითხსაც ათანხმებს.

„ქართულ ოცნებას“ აღარც ძალა აქვს, აღარც - ლეგიტიმაცია და არც ხალხის ის ნდობა, რომელიც 2012 წელს ჰქონდა. მით უმეტეს, როდესაც გეუბნებიან, რომ რუსეთი არაა შენი მეგობარი და შენ მაინც რუსეთის წარმომადგენელი გინდა პრემიერად დანიშნო. ჩვენ ხომ ძალიან კარგად ვიცით, რომ გახარიას სხვა, რუსული კუდი მოჰყვება და ეს, სულ ცოტა, ერთი წელი მაინც შეგვიქმნის სერიოზულ პრობლემებს. მოკლედ, როგორც ჩანს აშშ-დან არაა დადებითი სიგნალი მის დანიშვნაზე, თორემ შიგნით ივანიშვილს ვერავინ დაუპირისპირდებოდა,“ - მიიჩნევს ჭიჭინაძე.

რაც შეეხება ღარიბაშვილის მინისტრთა კაბინეტში სავარაუდო დაბრუნებას, ჭიჭინაძის თქმით, ყველას კარგად ახსოვს, რომ ღარიბაშვილის მიმართ წაყენებული ბრალდებების ერთ-ერთი ავტორი თავის დროზე კახა კალაძე იყო.

„სწორედ მან მიიტანა კომპრომატები ჯანყარაშვილსა და მის გარემოცვაზე, ანუ თავის დროზე თუ კალაძემ დაამარცხა კომპრომატებით ღარიბაშვილი, ვფიქრობ, ახლა ღარიბაშვილი უფრო აქტიურად შეუტევს და უფრო მეტად სამართლიანი იქნება კალაძის მოქმედებებთან მიმართებაში, ვიდრე სხვა. მოკლედ, „ქართული ოცნება“ შიგნით ჭიდაობით, ინტრიგებითაა დაკავებული და ხალხს აბსოლუტურად მოწყდნენ და ესაა სამწუხარო რეალობა,“ - აცხადებს ჭიჭინაძე.