აქცია პრეზიდენტის რეზიდენციასთან - სალომე ზურაბიშვილს პოლიციელის მკვლელის შეწყალებისთვის პასუხს სთხოვენ

პოლიტიკა - 11:55, 02 Sep, 2019

805

ათონელზე, პრეზიდენტის რეზიდენციასთან საპროტესტო აქცია იმართება, ოპოზიცია და საზოგადოების წარმომადგენლები პრეზიდენტის მიერ პოლიციელის მკვლელობისთვის მსჯავრდებულის შეწყალებას აპროტეტსებენ. მათი თქმით, პრეზიდენტმა უნდა გასცეს მთავარ კითხვას პასუხი, თუ ვისი დავალებით მოხდა ამ პირის შეწყალება და რა მოტივით. აქციის წევრები ათონელზე პრეზიდენტის მისვლას ელოდებიან.

„ის რაც ჩვენ მოვისმინეთ სალომე ზურაბიშვილისგან და იმ შეწყალების აქტს, რასაც მან მოაწერა ხელი, ამისთვის საზოგადოება ითხოვს განმარტებას პირველი პირისგან, უფრო სწორად ადამიანისგან, რომელიც ერთი წლის წინ ივანიშვილმა დაუნიშნა ამ ქვეყანას პრეზიდენტად. შეწყალების აქტი, რომელიც გულისხმობდა პოლიციელის მკვლელობაში ბრალდებულის 3 წლის შემდეგ გარეთ გამოშვებას, არის აღმაშფოთებელი და ანტისახელმწიფოებრივი, იმიტომ რომ ის შეურაცხყოფს იმ პოლიციელს, რომელიც შეეწირა სამართლიანობისთვის ბრძოლას და იმ პოლიციელებსაც, რომლებიც დღეს პატიოსნად ასრულებენ თავის მოვალეობას. იმ ფონზე როცა ჩვენ ვხედავთ, რომ ხალხი დაკავებულია იმისთვის, რომ გავრილოვის ღამეს საქართველოს სიყვარულით გამოვიდა გარეთ და პოლიციასთან ძიძგილაობისთვის შვიდწლიანი პატიმრობისთვის ემუქრებიან, აღმოჩნდა რომ პოლიციელის მკვლელობა თურმე არაფერი არ ღირს.“- განაცხადა ზაალ უდუმაშვილმა. მისი თქმით, პოლიციელის მკვლელობისთვის მსჯავდებული პირის გათავისუფლება, პრეზიდენტის არჩევნების მეორე ტურისთვის კრიმინალებთან დადებულ შეთანხმებას უკავშირდება. უდუმაშვილის განცხადებით, ხელისუფლება არჩვენებს კრიმინალების დახმარებით ატარებს და მისი მთავარი მოკავშირე კრიმინალები არიან და ვადლებულები არიან რომ კრიმინალებს „კოჭი გაუგორონ“.

„სირცხვილია, გახარია როგორ უნდა გველაპარაკებოდეს პოლიციელის მუნდირის დაცვაზე, როდესაც პოლიციელის მკვლელის ციხიდან გამოშვებაზე ერთი განცხადებაც კი არ გაუკეთებია. ჩვენ მოვითხოვთ, გამობრძანდეს ქალბატონი სალომე და გვითხრას ვისი დავალებით ან რეკომენდაციით შეიწყალა პოლიციელის მკვლელი, ვისგან მიიღო დირექტივა.“- განაცხადა უდუამაშვილმა.