საპარლამენტო უმრავლესობის წევრის, თამარ ხულორდავას თქმით, "საპარლამენტო უმრავლესობის ხვალინდელ სხდომაზე მნიშვნელოვანი საკითხები განიხილება". არაერთი კითხვის მიუხედავად მმართველი პოლიტიკური პარტიის წარმომადგენელმა არ დააკონკრეტა ტოვებს თუ არა საქართველოს პრემიერი მამუკა ბახტაძე თანამდებობას და ინიშნება თუ არა მის ადგილზე შსწ მოქმედი მინისტრი გიორგი გახარია.

ხულორდავა ამბობს, რომ გარკვეულ საკითხებზე უმრავლესობის წევრები პოზიციებს შეაჯერებენ.

„ხვალ უმრავლესობის სხდომაა, ძალიან მნიშვნელოვანი საკითხები განიხილება, ჩვენ კიდევ უნდა შევჯერდეთ გარკვეულ საკითხებზე და ამის შემდეგ გავაკეთებთ კომენტარს. ხვალ საბოლოოდ იქნება შეჯერებული უმრავლესობის წევრების პოზიციები“, - განაცხადა თამარ ხულორდავამ.

რაც შეეხება კითხვას, პარლამენტის საშემოდგომო სესიაზე იქნება თუ არა პრემიერის წლიური ანგარიშის წარდგენა, დეპუტატი ამბობს, რომ ანგარიშის აუცილებლად განიხილება.

„პრემიერ-მინისტრის წლიური ანგარიში აუცილებლად იქნება განხილული საშემოდგომო სესიაზე“, - განაცხადა თამარ ხულორდავამ.