თბილისში, ანტონ ფურცელაძის ქუჩაზე საპატრულო და სამაშველო სამსახურის თნამშრომლები არიან მობილიზებულნი.

ფურცელაძის 17-ში ავარიულ საცხოვრებელ სახლს ნგრევის საფრთხე ემუქრება. საცხოვრებელი სახლიდან მოსახლეობა უკვე ევაკუირებულია.

ამ დროისთვის ორსართულიანი სახლის ყველა მობინადრე - 12 ოჯახი გამოყვანილია უკვე სახლიდან,მობილიზებულია სამაშველო სამსახური და ისინი მოსახლეობას უწევენ დახმარებას.

როგორც საგანგებო სიტუაციების სამსახურის წევრები აცხადებენ, საკმაოდ რთული მდომარეობაა, შესაბამისად, მობინადრეები ამ დროისთვის შენობაში შესვლას ვერ ახერხებენ.

მათ სურდათ, რომ გამოეტანათ სახლიდან ინვენტარი, თუმცა, თავად სპეციალისტების ინფორმაციით, ეს შეუძლებელია, რადგან არსებობს საშიშროება, რომ სახლი ჩამოინგრეს. მაცხოვრებლების განცხადებით, ავარიულმა სახლმა ნგრევა დღეს დილიდან დაიწყო:

,,დილის 8 საათიდან დაიწყო. აი, როგორც შეშა რომ ტკაცუნობს წვიმის დროს, ისეთი ხმა ჰქონდა. ამას არ მივაქციე ყურადღება და შემდეგ უკვე, როგორც მიწისძვრა, ისე წამოვიდა. 

ძალიან შეგვეშინდა და ჩამოვედით. ჩვენ რომ ჩამოვედით, ჭერი შემდეგ ჩამოინგრა, მეზობლები გამოვიყვანეთ. პირველ სართულზე ჩამოინგრა ჭერი. სახლის კარები ჩაეკეტა მეორე სართულზე მეზობელს და მოხდა მაშველების გამოძახება და იმათ ჩამოიყვანეს. ბინა არის დაახლოებით 170 წლის“, - ამბობს სახლში მცხოვრები ქალბატონი.