ბიბილოვმა წნელისის დაცვა ე.წ სასაზღვრო სასახურს დაავალა - ოკუპანტებმა სოფელში ე.წ სამხრეთ ოსეთის დროშა აღმართეს

პოლიტიკა - 19:46, 30 Aug, 2019

1717

ცხინვალის საოკუპაციო რეჟიმის დე ფაქტო პრეზიდენტი ანატოლი ბიბილოვი ოკუპირებულ სოფელ წნელისში იმყოფებოდა, რომელიც ხაშურის მუნიციპალიტეტის სოფელ ჩორჩანას ესაზღვრება. ბიბილოვმა კიდევ ერთხელ გააპროტესტა საქართველოს ცენტრალური ხელისუფლების მიერ სოფელ ჩორჩანაში ქართული პოლიციის საგუშაგო პოსტის აშენება და განაცხადა, რომ სოფელ წნელისის მთელ პერიმეტრს ე.წ სამხრეთ ოსეთის სასაზღვრო სამსახური დაიცავს. ბიბილოვი სოფელ წნელისში მას შემდეგ ჩავიდა, რაც მისმა წარმომადგენლებმა სოფელ ჩორჩანაში გამართულ IPRM-ის ტექნიკური შეხვედრაში მიიღეს მონაწილეობა.

"დასრულდა ტექნიკური შეხვედრა, საერთო შეთანხმებამდე ჯერ ვერ მივედით. უახლოეს დღეებში მოლაპარაკებები გაგრძელდება. სახელმწიფო უსაფრთხოების კომიტეტს დაევალა საგუშაგოს განთავსება, რათა ხალხი ამ სოფელში დაცული იყოს. სამწუხაროდ, საქართველო ჯერჯერობით არ გვთავაზობს ამ პრობლემის გონივრულ გადაწყვეტას, ჩვენი წინადადება უარყოფილია. რაც შეეხება თავად სოფელს, მე გავეცი ბრძანება, რომ სასაზღვრო უწყებებმა მთლიანად კონტროლის ქვეშ აიღონ ტერიტორია.“- განაცხადა ბიბილოვმა.

ბიბილოვის თქმით, „ხელისუფლება იმუშავებს იმაზე, რომ საქართველოს მიერ მოწყობილი უკანონო პოსტი, აღებული იქნას“. როგორც მან განაცხადა ძალისმიერი მეთოდების გამოყენებამდე, გამოყენებული იქნება პრობლემის მოგვარების ყველა მშვიდობიანი მეთოდი.

„ძალისმიერი გადაწყვეტა უკიდურეს შემთხვევაში უნდა იყოს“- განაცხადა ბიბილოვმა.

ბიბილოვის თქმით, იმედოვნებენ რომ საქართველოს ხელისუფლება სიტუაციის სერიოზულობას გააცნობიერებს და გააკეთებს ყველაფერს იმ არასტაბილურობის მოსაგვარებლად, რომელიც მათმა დაუფიქრებელმა ნაბიჯებმა გამოიწვია.

„მე ვთვლი, რომ ეს არის ყველა დონის მოლაპარაკებებთან აგდებული დამოკიდებულება. ყველა შესაძლო ნაბიჯი, რომლის გადადგმაც იგეგმება, მხარეებმა უნდა განიხილონ IPRM-ისა და ჟენევის დისკუსიების დონეზე, ქართულმა მხარემ აგდებული დამოკიდებულება გამოიჩინა ამ ფორმატის მიმართ და მიიღო არასტანდარტულინ და არასწორი გადაწყვეტილება. მე დარწმუნებბული ვარ რომ სიტუაცია განიმუხტება და დაძაბულობა ჩაცხრება.“- აღნიშნა ბიბილოვმა. მისი თქმით, სოფლის მთელ პერიმეტრს ე.წ სამხრეთ ოსეთის სასაზღვრო სამსახური დაიცავს.

ბიბილოვის წნელისში ჩასვლიდან ცოტა ხანში სოფელში ცხინვალის საოკუპაციო რეჟიმის დროშა აღმართეს.