პრეზიდენტ სალომე ზურაბიშვილის მიერ 22 წლის პოლიციელის თარაშ მუკბანიანის მკვლელის შეწყალებას „ერთიანი ნაციონალური მოძრაობის“ პოლიტსაბჭოს თავმჯდომარე ნიკა მელია ცინნიზმს უწოდებს. მელიას თქმით, ყველაზე მნიშვნელოვანია გაირკვეს ის პიროვნება, რომელის ინიციატივაც იყო პოლიციელის მკვლელის შეწყალება.

ეს არ უნდა შერჩეს სალომე ზურაბიშვილს, შეუძლებელია. არ შერჩენაში ვგულისხმობ მძიმე ფასის გადახდას.წარმოიდგინთ ამაზე დიდი ცინიზმი, როდესაც კრიმინალმა მოკლა პოლიციელი, პოლიციელისვე ტაბელური იარაღით, დაჭრა თურქეთის ორი მოქალაქე, მიუსაჯეს 12 წელი და ახლა ქალბატონმა შეიწყალა. ქალბატონ ზურაბიშვილს რომ არ ეცოდინებოდა, ვინ არის დევაძე, ამაში ეჭვი არ მეპარება. მაგრამ ვინ იყო ინიციატორი, რომ დევაძე შეეწყალებინა, ეს არის გასარკვევი და ამაზე უნდა ისაუბროს ქალბატონმა ზურაბიშვილმა, თუ არ ისაუბრებს, მე ვფიქრობ პროცესები განვითარდება არა ისე, როგორც მას სურს. ზურაბიშვილმა ჩვენ უნდა გვითხრას კონკრეტული სახელი და გვარი ვინ იყო ინიციატორი, ვისი ხათრითაც შეიწყალა, თორემ ზოგადად რომ ეს ხელისუფლება იქნებოდა და გახარიასთან კავშირში ფაქტია. შსს-ს გარეშე ამას ვერ გააკეთებდნენ.“- განაცხადა ნიკა მელიამ.

შეგახსენებთ, 28 აგვისტოს შეწყალების შედეგად, საპატიმრო დატოვა მოჭიდავე რამაზ დევაძემ, რომელიც სასჯელს პოლიციელის მკვლელობისთვის იხდიდა.

მკვლელობა ბათუმში 2014 წლის 27 დეკემბერს ღამის კლუბ "ლეგასში" მოხდა. ცნობილია, რომ 22 წლის პოლიციელი, თარაშ მუკბანიანი ამ დროს სამსახურებრივ მოვალეობას არ ასრულებდა, თუმცა თან ჰქონდა სამსახურებრივი ცეცხლსასროლი იარაღი. ის სწორედ ამ იარაღიდან გასროლის შედეგად დაიღუპა.

2015 წლის სექტემბერში, ბათუმის საქალაქო სასამართლომ რამაზ დევაძე დამნაშავედ ცნო თარაშ მუკბანიანის განზრახ მკვლელობაში და 12 წლით თავისუფლების აღკვეთა მიუსაჯა. ეს განაჩენი არც სააპელაციო და უზენაეს სასამართლოებს შეუცვლიათ. რამაზ დევაძემ მხოლოდ 4 წლიანი სასჯელი მოიხადა და პრეზიდენტის შეწყალების შემდეგ, 28 აგვისტოს საპატიმრო დაწესებულება დატოვა.