ამერიკელმა სენატორებმა ჯეკ რიდმა, ჩაკ შუმერმა, რობერტ მენენდესმა და მარკ უორნერმა აშშ-ის პრეზიდენტს დონალდ ტრამპს ღია წერილით მიმართეს, სადაც რუსეთის G7-ში (შვიდთა ჯგუფში) დიდ შვიდიანში დაბრუნების წინააღმდეგ გამოდიან.

სენატორების განცხადებით, G7-ის დანიშნულება არის „დემოკრატიული ქვეყნების ეკონომიკური განვითარება საერთაშორისო კანონმდებლობისა და საერთო ღირებულებების დაცვით, ხოლო რუსეთი არ წარმოადგენს არც დემოკრატიულ ინსტიტუციებს და არც ეკონომიკურ ძალას, რომელიც უნდა შეუერთდეს ჯგუფს“.

წერილში აღნიშნულია, რომ რუსეთი დიდი რვიანიდან 2014 წელს ყირიმის უკანონო ანექსიის გამო გარიცხეს და რუსეთის ხელისუფლების ეს ქმედება იყო უკრაინის ტერიტორიული მთლიანობისა და საერთაშორისო შეთანხმებების უხეში დარღვევა, ამიტომ რუსეთის მთავრობა არ იმსახურებს ნდობას, რათა ის წარმოდგენილი იყოს ლიდერად მსოფლიო ასპარეზზე. ამასთან, რუსეთი დიდი რვიანიდან გარიცხვის შემდეგაც არაფრად აგდებდა საერთაშორისო ნორმებს და კანონის უზენაესობის პრინციპს:

„ - მავნე ზეგავლენა აშშ-ის 2016 და 2018 წლის არჩევნებში, მათ შორის სისტემატური ჩარევის მცდელობა;

- მავნე ზეგავლენა ევროპაში ჩვენი უახლოესი მოკავშირეების დემოკრატიებზე ;

- თავდასხმა ქიმიური იარაღით დიდი ბრიტანეთის მიწაზე;

- საქართველოს ტერიტორიების ოკუპაციის გაგრძელება;

- ავტორიტარული მთავრობების სამხედრო და სხვა სახის მხარდაჭერა მთელს მსოფლიოში, მათ შორის ასადისა და მადუროს რეჟიმების; და

- უმცირესობებისა და პოლიტიკური ოპონენტების ფართოდ გავრცელებულ დევნა რუსეთში."

ამ მიზეზების გამო, სენატორების აზრით, ვლადიმირ პუტინი არავითარი პირობებით არ უნდა დაუშვან დიდ შვიდიანში, სანამ რუსეთის მთავრობა არ მოახდენს დემონსტრირებას, რომ მზად არის, მოიქცეს პასუხისმგებლიანად როგორც შინ, ისე გარეთ.