"უკიდურესად სახიფათო და პროვოკაციული ქმედება"- ჩორჩანაში რუსული სამხედრო ტექნიკის გადაადგილების საკითხს IPRM-ის შეხვედრაზე დააყენებენ

პოლიტიკა - 12:13, 29 Aug, 2019

1446

ხაშურის მუნიციპალიტეტის სოფელ ჩორჩანას სიახლოვეს, ოკუპირებულ ტერიტორიაზე საოკუპაციო ძალის სამხედრო ტექნიკის გადაადგილებას სუს-ის ანალიტიკური სამსახურის უფროსის მოადგილე ირაკლი ანთაძე უკიდურესად სახიფათო პროვოკაციული ქმედებად აფასებს, რომელიც მისი თქმით, ხელს უწყობს დაძაბულობის ხელოვნურად ესკალაციას.

ანთაძის განცხადებით, ეს საკითხი სხვა მწვავე საკითხებთან ერთად დღეს, 29 აგვისტოს ინციდენტების პრევენციისა და მათზე რეაგირების მექანიზმის მორიგ შეხვედრაზე მწვავედ დაისმება.

"ჩორჩანაში ადგილი აქვს მცდელობას, ხელოვნურად მოხდეს დაძაბულობის ესკალაცია. ეს არის უკიდურესად სახიფათო და პროვოკაციული ქმედება და ჩვენ ამ საკითხს მთელი სიმწვავით გავაჟღერებთ დღევანდელ შეხვედრაზე.

დაგეგმილია 10 საკითხის განხილვა. განვიხილავთ წინა შეხვედრიდან დღემდე ოკუპირებულ ტერიტორიებზე დაფიქსირებულ ყველა მნიშვნელოვან ინციდენტს, რაც საფრთხეს უქმნის ადგილზე არსებულ უსაფრთხოების გარემოს. სამწუხაროდ, მოცემულ პერიოდში უკიდურესად სახიფათო და დესტრუქციული ქმედებების შედეგად დაგროვდა არა ერთი აღმაშფოთებელი ინციდენტი, რასაც მთელი სიმწვავით გავაჟღერებთ დღევანდელ შეხვედრაზე. ვგულისხმობ მაგალითად გუგუტიანთკარში განხორციელებულ უკანონო ბორდერიზაციას, რა დროსაც ადგილობრივ მკვიდრ მოსახლეობას საოკუპაციო ძალებმა პირდაპირ ეზოში აღუმართეს ხელოვნური ბარიერები. ასევე, მწვავედ გავაპროტესტებთ ხაშურის მუნიციპალიტეტის სოფელ ჩორჩანას მიმდებარედ საოკუპაციო ძალების პროვოკაციულ ქმედებებს, რაც ადგილზე დაძაბულობის ხელოვნურად ესკალაციას წარმოადგენს. ვისაუბრებთ საოკუპაციო ხაზის გასწვრივ საქართველოს მოქალაქეების უკანონოდ დაკავების ფაქტებზე, ასევე, მთელი სიმძაფრით დადგება ოკუპირებულ ქართულ სოფელ ერეთში საოკუპაციო ძალების მიერ განდევნილი ადგილობრივების სახლების დანგრევის და მათ ადგილზე ნაგავსაყრელის მოწყობის საკითხი" - განაცხადა ირაკლი ანთაძემ.

გუშინ ცხინვალის საოკუპაციო რეჟიმის მედიამ გაავრცელა ინფორმაცია, რომ ცხინვალის საოკუპაციო რეჟიმმა ე.წ მესაზღვრეებმა ზნაურის რაიონში ჯავშანტექნიკით რეიდი ჩაატარეს, რომელსაც კოორდინაციას დე ფაქტო პრეზიდენტი ანატოლი ბიბილოვი და ე.წ სახელმწიფო უსაფრთხოების კომიტეტის თავმჯდომარე ოლეგ შირანი უწევდნენ. ბიბილოვის თქმით, სტაბილურობისა და უსაფრთხოების შენარჩუნების მიზნით, ე.წ საზღვრის დაცვა გაძლიერდება და ბლოკპოსტები აუცილებელ ადგილებში საჭირო რაოდენობით განთავსდება.