ნინოწმინდაში ახლადგახსნილ ეთნოგრაფიულ მუზეუმში "ოცნების" დეპუტატის ფოტო გამოფინეს (ფოტო)

პოლიტიკა - 14:19, 28 Aug, 2019

909

ნინოწმინდაში, სოფელ სათხეში ადგილობრივი ბიზნესმენის დაფინანსებით, ეთნოგრაფიული მუზეუმი გაიხსნა, სადაც სოფლის ძველ ტრადიციულ საოჯახო ნივთებთან და ფოტოებთან ერთად, დეპუტატ ენზელ მკოიანის ფოტო და ჯილდოებია გამოფენილი.

სოფელ სათხეში, ალბერტ ისოინის სახელობის ეთნოგრაფიული მუზეუმი,24 აგვისტოს გაიხსნა. მუზეუმი, ალბერტ ისოიანის შვილის, არტურ ისოიანის დაფინასებით აშენდა, რომელიც ბიზნესმენია და რუსეთში ცხოვრობს. აქ, გამოფენილია სოფლისათვის დამახასიათებელი ძველი ტრადიციული საყოფაცხოვრებო ნივთები და საოჯახო ფოტოები, მათ შორის არის ნინოწმინდა–ახალქალაქის მაჟორიტარი დეპუტატის ენზელ მკოიანის ფოტო და ჯილდოებიც.

ენზელ მკოიანი, „სამხრეთის კარიბჭესთან“ აცხადებს, რომ სოფელ სათხეშია დაბადებული და გაზრდილი, რის გამოც შესთავაზეს, მისი ფოტო და ჯილდოები ეთნოგრაფიულ მუზეუმში განთავსებულიყო.

„იქ გამოფენილია იმ პროფესორების, აკადემიკოსების თუ მეცნიერების ფოტოები, რომლებიც სათხეში დაიბადნენ. მეც რახან დეპუტატი ვარ, ჩემი ფოტოც თვითონ გააკეთეს. თან მითხრეს ამ ჯილდოების დადება შეიძლებოდა თუ არა და დავთანხმდი. ჯილდოები სიმბოლურად იყო და ისევ უნდა ავიღო“,–გვითხრა დეპუტატმა.

სათხეში, ეთნოგრაფიული მუზეუმის გახსნას ენზელ მკოიანთან ერთად, სომხური სამოციქულო და მართლმადიდებლური ეკლესიის სასულიერო პირები, ნინოწმინდისა და ახალქალაქის მუნიციპალიტეტების ხელმძღვანელი პირები, ელჩები, ასევე რუსეთიდან,სომხეთიდან და საქართველოს სხვადასხვა კუთხეებიდან ჩამოსული სტუმრები დაესწრნენ.

ენზელ მკოიანის თქმით, ისოიანების ოჯახის სურვილია, ეთნოგრაფიული მუზეუმი, მუნიციპალიტეტს სიმბოლურად ფასად, ერთ ლარად გადასცენ.