გაუფასურებული ლარი, შემცირებული ინვესტიციები და გაზრდილი გასახადები- "რ2"-ის გამორთვა და ლარის გაუფასურება, რომ კავშირში არ არის, ახლა მაინც გამოჩნდა"

ბიზნესი & ეკონომიკა - 12:01, 27 Aug, 2019

1748

მართალია, 20 აგვისტოდან "რუსთავი 2"-ის ეთერით მთავრობისთვის არასასურველი, კრიტიკული აზრი აღარ ისმის, თუმცა ქვეყნის მოსახლეობისთვის მთავარი და ყველაზე მტკივნეული თემა, კვლავ რეკორდულად გაუფასურებული ლარია.
ეროვნული ბანკის ოფიციალური მონაცემებით, ერთი ამერიკული დოლარის ოფიციალური ღირებულება 2.9399 ლარია, კურსი გაცილებით მაღალია კომერციულ ბანკებში.

ეკონომიკის ექსპერტი ირაკლი ყიფიანი მძიმე სურათს "ქართული ოცნების" 7 წლიან მმართველობას უკავშირებს:

"რუსთავი 2"-ის გამორთვა და ლარის გაუფასურება, რომ ერთმანეთთან კავშირში არ არის, ახლა მაინც გამოჩნდა. "რუსთავი 2" თუ რამეს საუბრობდა ეკონომიკაზე, საუბრობდა იმ რეალობაზე რაც ქვეყანაში იყო. მეორე საკითხია ეს ვის მოსწონდა ან არ მოსწონდა.

პრობლემები, რომელიც ეკონომიკაშია და რომელიც ეროვნული ვალუტის გაუფასურებას ეხება, ეს არ გახლავთ ერთ დღეში დაგროვებული, ეს არის ბოლო 7 წლის განმავლობაში დაგროვებული პრობლემები და ამ შვიდი წლის შემდეგ ჩვენ მივიღეთ ისეთი ბიზნეს გარემო, სადაც ბიზნესს არ სჯერა, რომ საქართველოში მისი ბიზნესი სტაბილური იქნება. ანუ სტაბილურობადაკარგული ბიზნესგარემო მივიღეთ, შესაბამისად, ასეთ გარემოში ნაკლებად ხდება ინვესტიცია, ნაკლებად დებენ ფულს ეკონომიკაში. რეალურად ინვესტიციები წინა წელთან შედარებით 1,8 მილიარდიდან 1,2 მილიადამდე შემცირდა. მივიღეთ ეკონომიკაში საზიანო რეფორმები, როგორიცაა აქციზზე გადასახადების ზრდა, ამას დამატებული საპენსიო რეფორმა, რომელიც დამატებითი გადასახადების ზრდისკენაა ორიენტირებული. მივიღეთ კორუფციაში ჩართული სახელმწიფო აპარატი და 2012-18 წლამდე 50 000-ით გაზრდილი ჩინოვნიკთა რაოდენობა. ამ ყველაფრის ერთობლიობაა ის რატომაც არ იზრდება ეკონომიკა ეროვნული ვალუტა კი უფასურდება"- განაცხადა ირაკლი ყიფიანმა "ნიუპოსტთან".