შუუშლის თუ არა ერთმანეთს ხელს "ფორსაჟის" გადაღება და აქცია #სირცხვილია რუსთაველზე

შუუშლის თუ არა ერთმანეთს ხელს "ფორსაჟის" გადაღება და აქცია #სირცხვილია რუსთაველზე - შოთა დიღმელაშვილი განმარტებას აკეთებს

პოლიტიკა - 17:16, 26 Aug, 2019

1808

„სირცხვილიას“ აქციის ერთ-ერთი ორგანიზატორის შოთა დიღმელაშვილის თქმით, ჰოლივუდური ფილმის „ფორსაჟის“ გადაღება და აქციის მედიაპროექტის მიმდინარეობა ერთმანეთს დროში არ ემთხვევა და შესაბამისად არც ხელს შეუშლის:

„თანამემამულენო, როგორც იცით ხვალიდან, რამდენიმე დღით, რუსთაველი იკეტება ჰოლივუდური ფრანშიზის, Fast and furious (ე.წ. "ფორსაჟი") გადასაღებად.

ისიც იცით, რომ პარლამენტის წინ შსს მინისტრის გადადგომის მოთხოვნით უკვე ორ თვეზე მეტია, ჩვენი მშვიდობიანი მანიფესტაცია იმართება; აგვისტო-სექტემბრის განმავლობაში ამ ტერიტორიიდან, 20:20 სთზე, მედიაპროექტი #სირცხვილია მაუწყებლობს ყოველდღიურ რეჟიმში და ონლაინრეიტინგების რეკორდებს ხსნის. გეგმის მიხედვით 20 სექტემბრამდე ასე გაგრძელდება, 20 სექტემბერს კი "გამოდი, გამოდი, გამოდი, გამოდი, გამოდი, გამოდი, გამოდი გარეთ!" – ვუბრუნდებით მასობრივი აქციის ფორმატს.

მოგეხსენებათ, საინფორმაციო ველი მოცულია საბიუჯეტო და კერძო სახსრებით ხელგაშლილად დაფინანსებული დეზინფორმაციული გვერდებითა და არხებით, რომლებიც ქვეყანაში სამართლიანობის დამკვიდრებისთვის მებრძოლი მანიფესტაციის დისკრედიტაციას ცდილობს.

ამიტომაც ამ ორი მოვლენის – "ფორსაჟის" და "სირცხვილიას" – თანაკვეთის შესახებ ყალბი სპეკულაციების თავიდან ასაცილებლად (როგორიც შეიძლება იყოს "ამათ გამო ქვეყანა მილიონებს დაკარგააავს!!!"), საჭიროდ ჩავთვალეთ დაგვეზუსტებინა, რომ ჩვენ კვირების წინ შევხვდით Fast and furious-ის გულისხმიერ გუნდს და შევთანხმდით რაღაცებზე.

კერძოდ: მართალია რუსთაველი ჩაკეტილია, მაგრამ Fast and furious-ის გადაღება მიმდინარეობს მხოლოდ დღის შუქზე, ხოლო 20:20 საათისთვის, როცა #სირცხვილია იწყება, გადაღების პროცესი დასრულებული იქნება და ჩვენ გვექნება შესაძლებლობა შეუფერხებლად გავაგრძელოთ მანიფესტაცია არსებული ფორმატით. ორივე მხარე ერთმანეთის დაუბრკოლებლად გააკეთებს საკუთარ საქმეს.

აქამდე შესაძლებლობა არ მქონია, საჯაროდ მადლობა გადამეხადა ამ გუნდის როგორც ქართული, ისე ამერიკული მხარისთვის. უღრმესი მადლობა მათ, რომ თავადვე გამოიჩინეს ინიციატივა და უმაღლესი სამოქალაქო თვითშეგნება!“- წერს შოთა დიღმელაშვილი.