„ქართული ოცნების“ წევრი ბიძინა გეგიძე გუნდს აკრიტიკებს. "კბირის პალიტრისთვის" მიცემულ ინტერვიუში აცხადებს, რომ „ქართული ოცნების“ გუნდმა გადაუხვია ოთხპუნქტიან გეგმას,სადაც საუბარია სამართლიანობასა და თავისუფლებაზე.

"2012 წელს "ოცნების" ლიდერები ამბობდნენ, კანონი უნდა მართავდეს ქვეყანასო, მაგრამ ეს ახლა ყველას დაგვავიწყდა. მედიაზე არც სამართლებრივი და არც პოლიტიკური თავდასხმა არ შეიძლება"- აცხადებს გეგიძე.

„ფაქტია, გადავუხვიეთ მთავრობის ოთხპუნქტიან გეგმას: სამართლიანობა, თავისუფლება, კეთილდღეობა, განვითარება.

თავისუფლება უნდა ეხებოდეს მედიასაც და სასამართლოსაც. 2012 წელს "ოცნების" ლიდერები ამბობდნენ, კანონი უნდა მართავდეს ქვეყანასო, მაგრამ ეს ახლა ყველას დაგვავიწყდა. მედიაზე არც სამართლებრივი და არც პოლიტიკური თავდასხმა არ შეიძლება. ქვეყანაში ძალიან ბევრი უარყოფითი პროცესი მიმდინარეობს და რაც მთავარია, უფრო მეტი ემატება“, - განაცხადა გეგიძემ.

მისი თქმით, თუ 2020 წლისთვის მოცემული რეალობა არ შეიცვალა და ამასთან, საზოგადოებას სასამართლოსადმი ნდობა არ გაუჩნდება, მომავალი წლის საპარლამენტო არჩევნები უაზრო იქნება.

„ხელისუფლება კი არა, ზოგჯერ ექსპერტები და მედიაც კი არ არიან ადეკვატური. თუმცა მედიას აქვს ფუფუნება ასე მოიქცეს, ხელისუფლებას კი არა. ამიტომაც გაჩნდა უამრავი ეჭვი. დღეს ხელისუფლებაში ყოფნის კომფორტი ვერ წარმომიდგენია. თუ ადრე ამბობდნენ, საქართველო ­ არჩევნებიდან არჩევნებამდე ცხოვრობსო, ბოლო თვეებია, ბრიფინგიდან ბრიფინგამდე ვცხოვრობთ. 2020 წლამდე ეს რეალობა თუ არ შეიცვალა, თუ პოზიტიური პროცესები არ დაიწყო, საზოგადოებას სასამართლოს ნდობა არ გაუჩნდა, 2020 წლის არჩევნებს აზრი არ ექნება“, - განაცხადა ბიძინა გეგიძემ "კვირის პალიტრასთან".