გორში 5 წლის ბავშვს მოკვლით ემუქრებოდნენ - რა მოხდა წმინდაწყლის ერთ-ერთ უბანში

პოლიტიკა - 00:03, 26 Aug, 2019

1981

გორში მცირეწლოვან ბავშვს მოკვლით ემუქრებოდნენ. ,,დიანიუსის" ინფორმაციით, შემთხვევა წმინდა წყლის დასახლებაში მოხდა. 34 წლის მამაკაცი ადგილობრივების ინფორმაციით, საკუთარ ცოლს სცემდა და სიტყვიერ შეურაცხყოფას აყენებდა. 5 წლის შვილს კი მოკვლით ემუქრებოდა.

,,კარგად არ ვიცნობდით ამ კაცს, იშვიათად გამოდიოდა კონტაქტზე, თუმცა როგორც გავიგეთ საკუთარ ცოლს გამუდმებით სცემდა, ბოლოს შვილსაც კი ემუქრებოდა მოკვლით. მანიაკი იყო, როგორ შეეძლო ასეთი რაღაცეების გაკეთება" - აცხადებს ერთ-ერთი ადგილობრივი.

როგორც შინაგან საქმეთა სამინისტროში აცხადებენ, ოჯახში ჩადენილი ძალადობისა და მუქარის ბრალდებით, 1985 წელს დაბადებული, წარსულში არაერთგზის ნასამართლევი კაცია დაკავებული. სამართალდამცველებმა ის ოთხშაბათს დააკავეს.

,,მას შემდეგ, რაც აღნიშნული ფაქტის შესახებ პოლიციისთვის ცნობილი გახდა, ბ.ქ. რამდენიმე დღის განმავლობაში, 1981 წელს დაბადებულ, წარსულში არაერთგზის ნასამართლევ დ.მ-ს კუთვნილ საცხოვრებელ სახლში, გორში იმალებოდა, რომელიც პოლიციამ, ასევე, წვრილმანი ხულიგნობისა და სამართალდამცველებისადმი დაუმორჩილებლობის ბრალდებით დააკავა. სამართალდამცველები, ასევე, იკვლევენ მათ მიერ ჩადენილ შესაძლო დანაშაულებრივ ქმედებებსაც. კერძოდ, სხვისი ნივთის დაზიანების ან განადგურებისა და ნარკოტიკების უკანონო შეძენა-შენახვის ფაქტებს. მიმდინარეობს კომპლექსური საგამოძიებო მოქმედებები და დანიშნულია შესაბამისი ექსპერტიზები." - აცხადებენ შინაგან საქმეთა სამინისტროში.

მომხდარ ფაქტზე გამოძიება როგორც ოჯახში ძალადობისა და მუქარის, ისე, წვრილმანი ხულიგნობისა და სამართალდამცველების კანონიერი მოთხოვნისადმი დაუმორჩილებლობის ფაქტებზე, საქართველოს სსკ-ს 126-ე პრიმა და 11 პრიმა 151-ე მუხლებით, ასევე, საქართველოს ასკ-ს 166-ე და 173-ე მუხლებით მიმდინარეობს.