"გრძელდება ჩვენი დევნა, პროკურატურა გადაიქცა რეჟიმისთვის არასასურველი ადამიანების დამსჯელ აპარატად"- ბადრი ჯაფარიძე

პოლიტიკა - 20:37, 22 Aug, 2019

752

თიბისი ბანკის დამფუძნებლის ბადრი ჯაფარიძის თქმით, ბრალი რომელიც მას და მამუკა ხაზარაძეს აქვთ წარდგენილი აბსურდული ცილისწამებაა, პროკურატურა კი რეჟიმისთვის არასასურველი ადამიანების დამსჯელ აპარატადაა გადაქცეული. ჯაფარიძის თქმით, იოსინი არაფერზე ამოფარებას არ აპირებენ და მზად არიან შემდგომი გართულებებისთვისაც, რომელიც ხელისუფლებისგან ელოდებათ:

„გრძელდება ჩვენი დევნა, პროკურატურა, როგორც სახელმწიფო ინსტიტუტი განადგურებულია, ის გადაიქცა რეჟიმისთვის არასასურველი ადამიანების დამსჯელ აპარატად. ეს ბრალი შეიძლება თავისი ცინიზმით და უზნეობით შეუდარდეს უდანაშაულო ადამიანისთვის იარაღის ან ნარკოტიკის ჩადებას ჯიბეში. გენერალური პროკურორი, რომელიც პასუხისმგებელია ამ ბრალის ჩვენდამი წაყენებაში, დღეს მიისწაფვის უზენაესი სასამართლოს თავმჯდომარეობისკენ, მინდა გითხრა ის არის პირდაპირ პასუხისმგებელი ყველა იმ აბსურდულ ბრალზე, რომელიც ჩვენ წაგვიყენეს, მისი ხელდასმით ხორციელდება ეს და ამ პასუხისმგებლობას იგი ვერ გაექცევა. ზოგიერთ ხელისუფლების წარმომადგენელს გაუგია სიტყვა ინდულგენცია და იყენებს ამ სიტყვას სრულიად უკონტექსტოდ და გაუგებრად, მინდა მათ ვუთხრა, რომ ინდულგენცია სულ სხვა რამეს ნიშნავს. ჩვენ არაფერზე ამოფარებას არ ვაპირებთ. აქედან გამომდინარე, ჩვენ მზად ვართ, შემდგომი გართულებებისთვის.“- განაცხადა ბადრი ჯაფარიძემ.