მამუკა ხაზარაძე და ბადრი ჯაფარიძე დღეს მთავარ პროკურატურაში მათთვის ბრალის დაზუსტების საკითხზე იყვნენ დაბარებილები. უწყებიდან გამოსვლის შემდეგ ადვოკატმა ზვიად კორძაძემ განაცხადა, რომ ხაზარაძისა და ჯაფარიძის წინააღმდეგ წარდგენილ დაზუსტებულ ბრალდებაში რამდენიმე ადგილას ჩამატებულია ბიზნესმენ ავთანდილ წერეთლის გვარი.

„იგივე ტექსტია, უბრალოდ ორ-სამ ადგილას ჩამატებულია ავთანდილ წერეთლის გვარი. მეტი არაფერი. არაფერი არ იცვლება არსებითად, მუხლიც იგივეა და შინაარსიც“- განაცხადა ადვოკატმა.

ზვიად კორძაძის განცხადებით პროკურატურის მიერ წარმოდგენილი სქემა აბსურდულია, რადგან საგამოძიებო ორგანოს მტკიცებით ხაზარაძემ და ჯაფარიძემ განიზრახეს, რომ საკუთარ ბანკისთვის მოტყუებით და თაღლითობით გამოეტყუებინათ ფული. ადვოკატის თქმით პროკურატურას ფულის გათეთრების მუხლი, ხაზარაძე-ჯაფარიძის ანგარიშების დაყადაღებისთვის დასჭირდა:

„ამისთვის ვითომდა დაუკავშირდნენ ავთო წერეთელს და მისი ხელშეწყობით მოახერხეს ეს. მათი ლოგიკით ეს არის თაღლითობა, მაგრამ იმისთვის, რომ თაღლითობა ხანდაზმული იყო, ბრალის წარსადგენად მიაწებეს ფულის გათეთრება. პროკურატურამ ამ ბრალით დაამთავრა თავისი საქმე. მამუკა და ბადრი აღარ არიან ბანკის ხელმძღვანელობაში, აღარ არიან ანაკლიის პორტის ხელმძღვანელობაში და მათი ანგარიშები დაყადაღებულია ეს არის მიზანი, რომელიც ასრულდა ამ ყველაფრით.“- განაცხადა კორძაძემ.