ავთანდილ წერეთელისთვის ბრალის წარდგენა - პოლიტიკური პარტია „გამარჯვებული საქართველოს“ ერთ-ერთი ლიდერი კოტე კემულარია აღნიშნულს პოლიტიკურ დევნად აფასებს.

„რა სახის დანაშაულია სესხის აღება ბანკიდან კერძო პირის მიერ, შეუძლებელია, პროკურატურაში არ იცოდნენ, რადგან არავითარი დანაშაული არ არის სესხის აღება. პრაქტიკულად, დღეს გვაქვს საქმე დევნასთან. დევნიან ხაზარაძეს, რადგან მისთვის უნდა ჩამოეშორებინათ ანაკლია და ჩვენ მოვისმინეთ გია ვოლსკის განცხადება, თურმე, ანაკლია არ არის კერძო პირების, თურმე, ანაკლია სახელმწიფო პროექტი ყოფილა. საიდან, როდის გახდა ანაკლია სახელმწიფოსი. დღემდე ანაკლია, ყოველ შემთხვევაში, ვიცით, რომ კერძო პირების, იმ კონსორციუმის საკუთრებაა, რომლის დამფუძნებლებიც კერძო პირები არიან, მათ შორის უცხოელებიც. შესაბამისად, თუ სურვილი ჰქონდა სახელმწიფოს, წაერთმია ხაზარაძისთვის ანაკლიის პროექტი და შემდგომ დაშანტაჟება, რათა ხელისუფლებაში დარჩენა ანაკლიის მეშვეობით მომხდარიყო, რა თქმა უნდა, უნდა აღძრულიყო საქმე გამოგონილი პირობებით ხაზარაძის მიმართ, ასევე ავთო წერეთლის მიმართ, რომელიც პარალელურად უკავშირდება „ტვ პირველს“, რომლის მფლობელიცაა წერეთლების ოჯახი. მაშინ ჩვენ ვიღებთ პოლიტიკურ დევნას არჩევნების წინ და ასეთ პირობებში, როგორ უნდა ჩავატაროთ თავისუფალი არჩევნები. ეს ერთობლიობა ქმნის პირობებს, რომ ჩაატარო თავისუფალი და სამართლიანი არჩევნები. ჩვენ მივდივართ პირიქით. საჭიროა პოლიტპატიმრების დაუყონებლივ გათავისუფლება, დაუყონებლივ თანხმობის ჩამოყალიბება სახელმწიფოში და ასე მივალთ პროპორციულ არჩევნებამდე" - განაცხადა კემულარიამ.