გავრცელებული ინფორმაციით, ლაურა ღაჭავას მიმართ სისხლის სამართლებრივი დევნა სავარაუდოდ ნიკა გვარამიას მიერ ახალი ტელეკომპანიის „მთავარი არხის“ დაფუძნებას უკავშირდება. ვრცელდებოდა ცნობები, რომ ლაურა ღაჭავა იმ შენობის მფლობელია, რომელშიც მთავარი არხის ოფისი და პავილიონები უნდა განთავსდეს.

თავად ლაურა ღაჭავა „მთავარ არხთან“კავშირს უარყოფს და აცხადებს, რომ ის აპირებდა მის მფლობელობაში არსებული უძრავი ქონების გაყიდვას, თუმცა „მთავარ არხს“ გაცილებით დიდი ფართობი ჭირდებოდა. ღაჭავა ასევე უარყოფს იმას რომ ის ასტრა დიღომის შენობის მფლობელია.

“მე ადრე განაცხადი მქონდა მიცემული უძრავი ქონების სააგენტოებისთვის, რომ ობიექტებს ვყიდი, ვინაიდან ყველაფერზე ყადაღა მიდევს და ბანკების დიდი სესხი მაქვს, იძულებული ვიყავი, რომ რაღაც უძრავი ქონება გამეყიდა . მერე იყო რაღაც შეხვედრა, ვერ შევთანხმდით ჩვენ და ნიკა გვარამია თანხაში და იმან სხვა ობიექტი ნახა ალბათ. არ ვიცი, მე საქმის კურსში არა ვარ, ამას ამ წუთას არ ვუკავშირებ, რომ გავეცნობი გამოვალ და გეტყვით. მე რამდენიმე შენობის გაყიდვა მინდოდა, ერთი აეროპორტის ტრასაზეა, პატარა სასტუმროა, მაგრამ ტერიტორია დიდია, მეორე არის დიღომში. ასტრა პარკი ჩემი არაა, იქ იღებენ ახლა, ჩემი ობიექტი არის პატარა 1200 და 1600 კვადრატული, მაგათ უნდოდათ 5 ათასი. მე გავიგე ჭორის დონეზე რომ ასტრა დიღომს მიუბრუნდნენო“- განაცხადა ღაჭავამ.

„საფუძველს არ მაძლევს ვთქვა, რომ ეს პოლიტიკურია, გავეცნობი საქმის მასალებს.“- აღნიშნა ღაჭავამ. მისი თქმით, მას დარღვევები არ აქვს.

შეგახსენებთ, ფინანსთა სამინისტოს საგამოძიებო სამსახურის ინფორმაციით, ბიზნესმენი ლაურა ღაჭავას წინააღმდეგ ყალბი აქტივების შექმნის ფაქტზე სამართლებრივი დევნა დაიწყო. უწყების ცნობით, ლაურა ღაჭავას მიერ, გამოყენებული ყალბი აქტივის ოდენობა და სახელმწიფოსთვის მიყენებული, გამოძიებით, ამ ეტაპზე დადგენილი ზიანი შეადგენს 2 160 955 ლარს. ლაურა ღაჭავა ბრალდების წარდგენის მიზნით, დღეს, 14:00 სთ-ზე დაბარებულია ფინანსთა სამინისტროს საგამოძიებო სამსახურში. გამოძიება გრძელდება საქართველოს სისხლის სამართლის კოდექსის 210-ე მუხლის მე-2 ნაწილით, რაც სასჯელის სახით ითვალისწინებს თავისუფლების აღკვეთას 4-დან 7-წლამდე ვადით.